Բոլոնիայի գործընթացի մայիսի 14-15-ին երևանյան գագաթաժողովին ընդառաջ՝ լույս է տեսել պրոֆեսորներ Սերգո Երիցյանի եւ Արմեն Ճուղուրյանի «Բոլոնիայի գործընթացի հետագիծը» մենագրությունը, որտեղ ներկայացված են բարձրագույն մասնագիտական կրթական բարեփոխումներին առնչվող հեղինակային համառոտ դիտարկումներ եւ մեկնաբանություններ: Ինչպես նշվում է աշխատության առաջաբանում ՀՀ գիտության և կրթության նախարար Արմեն Աշոտյանի կողմից, «Մեր երկիրը հաստատակամ և կայուն քայլերով իրագործում է Բոլոնիայի գործընթացի թե ռազմավարական եւ թե մարտավարական նպատակադրումները:
Այդ մասին են վկայում նաեւ վերջին տարիներին բազմաթիվ հայրենական և միջազգային փորձագետների զեկույցները, որոնցում ներկայացվում են ՀՀ-ում ընթացող բարձրագույն մասնագիտական կրթության ոլորտի բարեփոխումների արդյունքները, նշելով մեր հաջողություններն ու անելիքները այս ուղղությամբ»:Հատկանշական է, որ դեռևս տասը տարի առաջ, Բոլոնիայի գործընթացի մեկնարկի ակունքներում կանգնած նախկին նախարար Ս. Երիցյանի կողմից Բերգեն քաղաքում ստորագրվեց Բարձրագույն կրթության եվրոպական տարածքին (ԲԿԵՏ) Հայաստանի Հանրապետության անդամակցության համաձայնագիրը:
Եվ հիմա, մեկ տասնյակի հեռավորությունից, արդեն մենագրության հեղինակի դիրքերից, համեմատական վերլուծություններ են արվում բարձրագույն կրթական համակարգում մեր ձեռքբերումների և հետագա անելիքների ուղղությամբ: Հրատարակված մենագրությունում շեշտադրումներ են կատարվում Բոլոնիայի գործընթացի գործիքակազմի կիրառման արդյունքներին, վերլուծելով ԲԿԵՏ-ում ուսանողության շարժունության դրսեւորումները, աշխատաշուկա-բուհ փոխառնչությունները, ակադեմիական կրեդիտների կուտակման եւ փոխանցման արդյունավետությունը, ինչպես նաև Բոլոնիայի գործընթացի սոցիալ-տնտեսական տասնամյա հետագիծը:
Երևանյան գագաթաժողովը կազմակերպվում է «հարեւանության» սկզբունքով, եւ դրան մասնակից են դառնում ոչ միայն Բոլոնիայի գործընթացի համաձայնագրին միացած, այլև համաձայնագրից դուրս գտնվող երկրները: Այս առումով, հրատարակված մենագրությունը նույնպես հետաքրքրաշարժ վերլուծություններ է պարունակում Բոլոնիայի գործընթացի անդրօվկիանոսյան արձագանքի շրջանակում: Հրատարակված մենագրությունն արժևորվում է նաև նրանով, որ այն հստակ նախանշում է Բոլոնիայի գործընթացին մեր հանրապետության անդամակցության ներազգային և միջազգային շահերի ներդաշնակեցման ուղիները և ԵԲԿՏ ճարտարապետության մարտահրավերները:
Կարդացեք նաև
Հեղինակների կարծիքով, Հայաստանի Հանրապետությունն այս տասը տարիների ընթացքում անդամակցելով Բոլոնիայի գործընթացին և այդ ոլորտում ունենալով տեսանելի հետագիծ՝ պետք է հաստատակամորեն հետամուտ լինի կրթական բարեփոխումների ոլորտում որդեգրած իր քաղաքականությանը ու մրցակցային դիրքեր գրավի կրթական ծառայությունների մատուցման միջազգային շուկայում: Բոլոնիայի գործընթացի երևանյան գագաթաժողովին ընդառաջ` այս նոր հրատարակումը սիմվոլիկ է նաեւ ժամանակային առումով եւ կարող է օգտակար լինել կրթության կառավարիչների, ուսանողների և պրոֆեսորադասախոսական համակազմի, ինչպես նաև կրթական բարեփոխումներով հետաքրքրվողների համար:
ՆՈՆՆԱ ԽԱՉԱՏՐՅԱՆ
տնտեսագիտության թեկնածու
«Առավոտ» օրաթերթ
14.05.2015 թ.
