Դատական դեպարտամենտի աշխատակիցների գործով մեղադրող Հակոբ Մելքոնյանը նախորդ նիստին փոխել էր մեղադրանքը եւ դեպարտամենտի նախկին նախագահ Միսակ Մարտիրոսյանին, Անգին Ղուկասյանին առաջադրել էր նոր մեղադրանք՝ խմբի կողմից կաշառք ստանալու հատկանիշներով:
Դատավոր Արշակ Վարդանյանը փորձեց իմանալ կողմի դիրքորոշումը: Իրեն մեղավոր չճանաչեց Անգին Ղուկասյանը, որին նախկինում մեղադրանք էր առաջադրվել կաշառք ստանալուն միջնորդելու համար, իսկ Միսակ Մարտիրոսյանին՝ կաշառք ստանալու համար:
Անգին Ղուկասյանն ասաց, որ մեղադրանքում տեղի է ունեցել կոսմետիկ փոփոխություն եւ իր արարքին ի սկզբանե քրեաիրավական որակում չի տրվել: Միսակ Մարտիրոսյանը դատավորի հարցին՝ հասկանալի՞ է մեղադրանքը, մատչելի՞ է, հայերենո՞վ է, պատասխանեց, որ հասկանալի չէ, բայց հայերենով է:
Կարդացեք նաև
Նա հանդես եկավ հայտարարությամբ, ասելով, որ երբ մեղադրողը ժամանակ էր խնդրել ճառին պատրաստվելու համար, իրականում իր մտքով անցել է, թե կաշառքի դրվագից կհրաժարվի: «Իմ սպասելիքները գերազանցեցին, բովանդակային առումով անհեթեթ էր մեղադրանքը: Ես այն կդասեի իրավագիտության գլուխգործոցների շարքը, երբ պաշտոնատար անձը օրենքով իր լիազորությունները իրականացնելու համար մեղադրվում է: Գերխնդիրը եղել է ամեն գնով ինձ մեղադրանք առաջադրելը»,- ասաց Միսակ Մարտիրոսյանը:
Մեղադրողը խնդրեց 2 ժամ: 2 ժամ հետո նա կասի, թե ինչ պատժաչափ եւ ինչ պատասխանատվության կենթարկվեն դատական դեպարտամենտի նախկին ղեկավարներն ու տարբեր ստորաբաժանումների պետերը:
Ռուզան ՄԻՆԱՍՅԱՆ
