«Թումո» ստեղծարար տեխնոլոգիաների կենտրոնում այսօր Բրիտանական ֆիլմերի փառատոնի հյուր Սայմոն Ուիլքինսոնը հանդիպեց լրագրողների հետ և հանդես եկավ վիրտուալ իրականության մասին մեդիա զրույցով: Սայմոն Ուիլքինսոնի աշխատանքը ներառում է աուդիովիզուալ միջոցներ, ինստալյացիա, վիրտուալ իրականություն, էլեկտրոնային երաժշտություն: Նա պատմեց, որ հաճախ համատեղում է այդ միջոցները:
«Սկսել եմ ստեղծագործել որպես երաժիշտ: Երբ երաժշտություն ես գրում մարդկանց համար, չես կարող օգտագործել նրանց այլ զգայարանները, բացի լսողականից: Հետո սկսեցի ֆիլմեր ստեղծել` հասկանալով, որ դրանց միջոցով հնարավոր է «գրկել» հանդիսատեսին եւ տանել քեզ հետ: Այդպես կարող ես զրուցել հանդիսատեսի հետ` հնարավորության դեպքում առանձին հանդիպել մարդու հետ եւ խոսել»,-Aravot.am-ի հետ զրույցում ասաց արվեստագետը:
Նրա բնորոշմամբ` նախկինում որոշ արվեստագետների առաջ խոնարհվում էինք, ինչպես եկեղեցու. «Իսկ հիմա դա հնացած ընկալում է, հիմա արվեստ նշանակում է զրույց: Այսօրվա աշխարհում մարդիկ հաղորդակցվելու համար օգտագործում են մեդիան, արվեստագետներն էլ պետք է այդպես անեն»:
Կարդացեք նաև
Հետաքրքրվեցինք, թե ինչ է հասցրել իմանալ Հայաստանի մասին: Մեր զրուցակիցն ասաց, որ շատ է ընթերցել մեր երկրի, Հայոց ցեղասպանության եւ Արցախյան հակամարտության մասին. «Տեսա Հայոց ցեղասպանության լուսանկարները… Որոշ երկրներ, այդ թվում իմը(Մեծ Բրիտանիան), ինչ-ինչ պատճառներով դեռ չեն ճանաչել Հայոց ցեղասպանությունը: Մտածում եմ` հավանաբար հենց մենք պետք է ճանաչենք այն: Ի դեպ, այն, ինչ տեսա այստեղ, անսպասելի էր. երիտասարդների համար անհավատալի հնարավորություններ կան: Մի պահ տխրեցի, որ իմ երկրում այդպես չէ»:
Հանդիպման ավարտին լրագրողները հարցրեցին` հնարավո՞ր է, որ Ուիլքինսոնը ֆիլմ նկարի Հայոց ցեղասպանության մասին: «Երբեք չեմ կարող կանխատեսել, թե ինչ կնկարեմ»,-ասաց նա:
Փառատոնի հյուրը ներկաներին նաեւ պատմեց իր «Խորանարդ» ֆիլմ-ներկայացման մասին, որը 1959թ.-ին ԱՄՆ-ում մի խումբ դեռահասների առեղծվածային անհետացման դեպքն է ներկայացնում: Առաջիկայում Ուիլքինսոնը կդասախոսի «Թումո»-ում:
Լուիզա ՍՈՒՔԻԱՍՅԱՆ
