«Loft» ինքնազարգացման եւ ժամանցի կենտրոնում այսօր ամփոփվեց «Web Ծիրան» 5-րդ համահայկական առցանց կինոփառատոնը, որի կազմակերպիչներն են «Ոսկե ծիրան» երևանյան միջազգային կինոփառատոնը և Webtv.am հայկական մշակութային ինտերնետ հեռուստատեսությունը:
«Փառատոնը կարող էր ավելի շատ առաջ գնալ, ֆիլմերի պակաս եմ զգում: Այն շատ ավելի կարեւոր հարթակ է, որտեղ կարելի է առանց վախենալու ուժերը փորձել եւ չանհանգստանալ, որ ժյուրիները կարող են չնկատել ֆիլմերը»,-ասաց «Ոսկե ծիրան» կինոփառատոնի հիմնադիր-տնօրեն Հարություն Խաչատրյանը:
«Web Ծիրան»-ի ժյուրին, որի կազմում են կինոռեժիսոր Միքայել Դովլաթյանը, կինոլրագրող Ռուզան Բագրատունին, լրագրող Գոհար Հակոբյանը, արդյունքներն ամփոփել է մարտի 3-ին՝ webtv.am մշակութային ինտերնետ հեռուստատեսության Youtube-ի պաշտոնական ալիքում տեղադրված 24 ֆիլմերը մեկ ամսվա ընթացքում դիտելուց հետո: Գլխավոր մրցանակակիրներն են Լուսինե Պապոյանը՝ «Ռադիոլա» և Գարիկ Ավագյանը՝ «Ես լսեցի մի անուշ ձայն…» ֆիլմերով: Նրանք պարգևատրվեցին 200.000-ական դրամով: Մրցանակները հանձնեց «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը:
Կարդացեք նաև
«Եթե փառատոնի ֆիլմերը դիտել է 14.000 մարդ, չափազանց կարեւորում եմ այն: Դա հավասարազոր է մի քանի տասնյակ լեփ լեցուն դահլիճների հանդիսատեսի թվին: Դա ինձ համար ամենաուրախալի փաստն է»,-նկատեց Webtv.am հայկական մշակութային ինտերնետ հեռուստատեսության տնօրեն Արայիկ Մանուկյանը:
Հավելենք, որ «Համակրանք» խրախուսական մրցանակը շնորհվեց Արման Այվազյանին` «Քառուղի» ֆիլմի համար, որը դիտել է 3018 օգտատեր:
Լուիզա ՍՈՒՔԻԱՍՅԱՆ
