Շենգավիթ վարչական շրջանի ընդհանուր իրավասության դատարանում մարտի 22-ին դատավոր Նելլի Բաղդասարյանի նախագահությամբ շարունակվում էր Վարդգես Գասպարիի գործ քննությունը:
Ինչպես արդեն տեղեկացրել ենք, պաշտպանական կողմը դատավորին ինքնաբացարկի միջնորդություն է ներկայացրել: Եվ Վարդգես Գասպարիի մյուս պաշտպանը՝ Լուսինե Հակոբյանը, ներկայացրեց միջնորդության լրացումը:
«Մեզ մոտ եւ այս ամենի ականատեսների գերակշիռ մասի մոտ իսկապես կասկածներ են առաջացել Ձեր հոգեկան առողջության մասին: Միգուցե Դուք իսկապես ի վիճակի չեք ….»,- ասաց նա:
Կարդացեք նաև
Դատավորը նրան ընդհատեց՝ հայտարարելով, որ նա իրավունք չունի նման բառերով հանդես գալ՝ «Մեկ ոչ կոռեկտ արտահայտություն եւ դատական սանկցիա կկիրառվի»:
«Միգուցե Դուք ի վիճակի չեք ո՛չ այս գործը շարունակել, ո՛չ նշված ինքնաբացարկի միջնորդությունը քննարկել եւ իրապես կարիք ունեք մասնագիտական օգնության կամ առնվազն տեւական հանգստի: Այս եզրակացությունը հիմնված է վերը նկարագրված հակասական, փոփոխական, անհավասարակշիռ, կոնֆլիկտային, նյարդային եւ հիստերիկ գնահատվող տարբեր դրսեւորումներից …»:
«Կոռեկտ եղե՛ք Ձեր հայտարարություններում»,- ընդհատեց նրան դատավորը եւ հեռացավ խորհրդակցական սենյակ՝ Լուսինե Հակոբյանի նկատմամբ սանկցիա կիրառելու համար:
Ամի ՉԻՉԱԿՅԱՆ
