ՀՀ վարչապետ Հովիկ Աբրահամյանը կառավարության այսօրվա նիստի սկզբում հայտարարեց, որ մեծ ուշադրություն են դարձնելու կրթական բարեփոխումներին ու դրանց արդյունավետ իրականացմանը, հատկապես հանրակրթական դպրոցական ծրագրերը պետք է լինեն մատչելի, հայեցի: Նա նշեց, որ ֆինանսական հոսքերն էլ պետք է ունենան պարզ, թափանցիկ ընթացակարգ:
«Ավագ դպրոցի հիմնախնդիրներից է մասնագիտական կրթության ոլորտը: Դպրոց-բուհ անցումը ապահովող կառույցների գործունեությունը պետք է վերանայել: Բուհ-աշխատաշուկա սերտացումը պետք է համալսարանական առաքելության կարեւորագույն հատկանիշներից մեկը լինի: Նաեւ պետք է բուհերի կառավարման խորհուրդների ձեւավորման վրա մեծ ուշադրություն դարձնել»,- ասաց Հովիկ Աբրահամյանը:
Նա կրթության եւ գիտության նախարարին հանձնարարեց բուհական բարեփոխումներին նվիրված խորհրդակցություն կազմակերպել, որտեղ բարեփոխումների իրականացման համար կնշվեն հստակ մեխանիզմներ: Ըստ վարչապետի՝ պետք է ներկայացվեն ուսանողակենտրոն ուսուցման հստակ թիրախները, նշվեն միջազգային շուկայում մեր տեղի ու մրցունակության մասին:
Իսկ գնումների ոլորտում կոռուպցիայի նվազմանն անդրադառնալով, ՀՀ վարչապետն ասաց. «Գնումների գործընթացի տարբեր փուլերում բարելավել թափանցիկությունը, համապատասխան կայքէջում տեսնել կնքված բոլոր պայմանագրերը, դրանց արդյունքները, ծրագրային լուծումներ մշակել: Ինչպես նաեւ՝ խիստ անհրաժեշտ է գնումների գործընթացի մեջ անհրաժեշտ ներքին աուդիտ անցկացնել: Հանձնարարում եմ ոլորտի պատասխանատուներին՝ պատշաճ ապահովել անհրաժեշտ թափանցիկությունը, ներկայացնել հաշվետվություններ, ինչպես նաեւ՝ վերստուգման հաշվետվությունները»:
Կարդացեք նաև
Նելլի ԲԱԲԱՅԱՆ
