Վարչապետն այսօր կառավարության նիստում Արդարադատության նախարար Արփինե Հովհաննիսյանին մի քանի հանձնարարականներ էլ տվեց, որոնք առնչվում էին բարձրաստիճան անձանց էթիկայի հանձնաժողովին, հայտարարագիր ներկայացնող անձանց ցանկի ընդլայնմանը:
Այսպես՝ վարչապետը Արդարադատության նախարարին հանձնարարեց երկշաբաթյա ժամկետում «Ապօրինի հարստացման քրեականացման» մասին նախագիծը ներկայացնել կառավարությանը: Նա նաեւ ասաց, որ «Ապօրինի հարստացման քրեականացման» նախագծի հետ անհրաժեշտ է ներկայացնել կանխիկ գործառնությունների սահմանափակող օրենքի նախագիծ:
«Այսպես կոչված կեղծ փոխառությունները, կեղծ նվիրատվությունները հիմնականում կատարվում են կանխիկ եղանակով: Եվ գործընթացը դարձնում են սկզբունքորեն անվերահսկելի: Շատ դեպքերում պարզ չէ, արդյոք հայտարարագիր ներկայացրած անձը ստացե՞լ է հայտարարագրում նշված փոխառությունը թե՝ ոչ»,-ասաց վարչապետը:
Այս խնդիրների լուծման նպատակով վարչապետը հանձնարարեց արդարադատության նախարարին Կենտրոնական բանկի հետ համատեղ երկշաբաթյա ժամկետում կառավարության քննարկմանը ներկայացնել կանխիկ գործառնությունները սահմանափակող օրենքի նախագիծ:
Վարչապետը նաեւ ասաց, որ անհրաժեշտ է ընդլայնել բարձրաստիճան պաշտոնատար անձանց Էթիկայի հանձնաժողովի լիազորությունները՝ սահմանելով ե՛ւ կրթական ե՛ւ կոռուպցիայի կանխարգելման գործառույթը. «Բացի դրանից անհարժեշտ է նաեւ կոռուպցիոն հանցագործությունների դեմ պայքարող իրավական մարմինների գործունեությունը դարձնել առավելագույնս հաշվետվողական: Այդ նպատակով պետք է օրենքով սահմանել պահանջ, որ այդ մարմինները կոռուպցիայի դեմ իրենց կատարած քայլերի մասին հանրային հաշվետվություն ներկայացնեն: Խոսքը գնում է առանձին, հենց կոռուպցիայի մասին հաշվետվությանը»,- նշեց Կարեն Կարապետյանը՝ արդարադատության նախարարին հանձնարարելով մեկամսյա ժամկետում ներկայացնել համապատասխան օրենսդրական նախագիծ:
Կարդացեք նաև
Վարչապետի խոսքերով, անհրաժեշտ է անդրադառնալ հայտարարագիր ներկայացրած անձանց շրջանակի ընդլայնմանը. «Կան պաշտոնատար անձիք, որոնք այս ցանկում ընդգրկված չլինելով, ընդգրկված են խոշոր տեղական գնումների գործընթացում կամ տարբեր այլ կոռուպցիոն ռիսկեր ներկայացնող տեսանկյունից գործունեության մեջ: Արդարադատության նախարարին հանձնարարում եմ երեք շաբաթյա ժամկետում կառավարություն ներկայացնել առաջարկություն՝ հայտարարագիր ներկայացնող անձանց շրջանակի ընդլայնման վերաբերյալ»:
Լուսինե ԲՈՒԴԱՂՅԱՆ
