Բերձորի Վահան Թեքեյանի անվան թիվ 1 միջնակարգ դպրոցի մարզադահլիճում կայացավ պատանիների բասկետբոլի շրջանային առաջնություն: Բացի Բերձորի 2 միջնակարգերից, առաջնությանը մասնակցեց նաև 3 թիմ՝ Կովսականի Թաթուլ Կրպեյանի անվան, Ծաղկաբերդի Աշոտ Նավասարդյանի անվան և Գետամեջի միջնակարգ դպրոցներից:
Առաջնության կազմակերպիչ, շրջվարչակազմի աշխատակազմի կրթության և սպորտի բաժնի առաջատար մասնագետ Արմեն Պետրոսյանը տեղեկացրեց, որ առաջնությունը կայանում է Արցախի հանրապետության ԿԳՍ նախարարության հաստատած կանոնակարգով, օլիմպիական մրցակարգով. հաղթող թիմը մարտի վերջին կմասնակցի Ստեփանակերտում կայացող հանրապետական առաջնությանը:
Առաջինը մրցեցին Բերձորի թիվ 1 և Կովսականի դպրոցների պատանիները. 19-11 հաշվով հաղթեց Բերձորի թիվ 1-ը:
Կովսականի դպրոցի ֆիզկուլտուրայի ուսուցիչ Տարոն Պողոսյանը տեղեկացրեց, որ իր սաները սիրով են մասնակցում մարզումներին և եկել են հաղթելու: Նույն դպրոցի 10-րդ դասարանի աշակերտ Ռազմիկ Քարամյանը նշեց, որ բացի մրցելուց, տարբեր բնակավայրերի աշակերտներով ծանոթացել են, ընկերացել;
Բերձորի Վահան Զատիկյանի անվ. թիվ 2 միջնակարգ դպրոցի թիմը՝ մարզիչ Թամարա Հովհաննիսյանի գլխավորությամբ, բոլոր խաղերում հաղթեց մրցակիցներին և գրավեց առաջին տեղը:
Առավել հետաքրքիր ու լարված պայքարում(22-12 հաշվով) անցավ հանդիպումը Բերձորի թիվ 1-ի թիմի հետ: Բոլոր հանդիպումներում պարտություն կրեց Գետամեջի թիմը, իսկ Ծաղկաբերդի աշակերտները հաղթեցին միայն 1 խաղում: Կավսականցիները հաղթանակ տարան Ծաղկաբերդի ու Գետամեջի աշակերտների նկատմամբ և դարձան երրորդ մրցանակակիր: Բերձորի թիվ 1-ի սաները (մարզիչ Նելլի Մարության) հայտնվեցին երկրորդ հորիզոնականում:
Այսպիսով՝ մարտի վերջին Ստեփանակերտում կայացող հանրապետական առաջնությանը Քաշաթաղի մարզական պատիվը կպահեն Բերձորի Վ. Զատիկյանի անվ. թիվ 2 միջն. դպրոցի բասկետբոլի մարզիկները:
Զոհրաբ Ըռքոյան