Մարտի 3-ին վերաբացված «Նոյյան Տապան» գրատանը տեղի ունեցավ արձակագիր, բանաստեղծ-թարգմանիչ, հրապարակախոս Լիա Ավետիսյանի «ПРО ЛЮБОВЬ, МЕНТОВ И ВРАГОВ» գրքի շնորհանդեսը։
Գիրքը դետեկտիվ ժանրի է և գրված է ռուսերեն լեզվով։ Վերնագրի համադրությունը և հակասությունը հեղինակը պարզաբանում է այսպես․«Առաջին բառը սերն է,փորձել եմ հասկացնել, որ սերը միայն անկողինը չէ, սերը հենց մենք ենք ու մեր հարաբերությունները։ Վերնագրի երկրորդ մասը ոստիկաններն են։ Մենք պետք է հասկանանք, գիտակցենք ,որ իսկապես ունենք ոստիկանի պաշտպանության կարիքը»։
Գիրքը պատմում է խուզարկու Արմեն Շավարշյանի (Շվարց) մասին, որը հեղինակի խոսքով, ամբողջ կյանքում զբաղվել է երկրի պաշտպանությամբ, մասնակցել է Ղարաբաղյան մարտերին։Եվ մի օր Շվարցը որոշում է հետաքննություն վարել իր հին ծանոթի սպանության գործով։ Գրքում դեպքերը շատ արագ են զարգանում և ամբողջ ընթացքում պահպանվում է դետեկտիվային ինտրիգը։
Շնորհանդեսից անմիջապես հետո ընթերցողները հնարավորություն ունեցան քննարկելու և իրենց կարծիքը հայտնելու գրքի հեղինակ Լիա Ավետիսյանին։
Լիդիա ԿԱՐԱՊԵՏՅԱՆ