Վերջին օրերի աղմկահարույց դեպքերի, մասնավորապես հայտնաբերված գրաֆիկական և գեղանկարչական աշխատանքների հետ կապված, Հայաստանի ազգային պատկերասրահը տեղեկացնում է, որ դրանք որևէ առնչություն չունեն թանգարանի հավաքածուում պահվող ցուցանմուշների հետ։
Խնդրում ենք զերծ մնալ անհիմն, չճշտված ու թյուր տեղեկություններ տարածելուց։
Հայաստանի ազգային պատկերասրահ
«Առավոտի» կողմից հիշեցնենք, որ «Ազատության» հետ զրույցում Սարյանի տուն-թանգարանի գլխավոր ֆոնդապահ, Սարյանի թոռնուհի Սոֆյա Սարյանը տեղեկացրել է, որ նախկին նախագահ Սերժ Սարգսյանի եղբոր՝ Ալեքսանդր Սարգսյանի տանը հայտնաբերված Մարտիրոս Սարյանի գծանկարները պատկանում են մեծ վարպետի ժառանգին։ Նրա փոխանցմամբ, Սարյանի որդու մահից հետո պետական ֆոնդ չփոխանցված գործերը 2013-ին բաշխվել են որդու ժառանգների՝ կնոջ և չորս երեխաների միջև։
Ըստ Սոֆյա Սարյանի, հիշյալ 14 գծանկարները, որոնք Ազգային անվտանգության ծառայությունը հայտնաբերել էր Սերժ Սարգսյանի եղբոր տանը, իբրև ժառանգություն փոխանցել են Սարյանի թոռանը՝ Ռուբեն Սարյանին։ Ապա նրա որդին՝ Ղազարոս Սարյանը, ով Մարտիրոս Սարյանի ծոռն է, այդ գծանկարները փոխանցել է Ալեքսանդր Սարգսյանի որդուն:
