Շվեյցարաբնակ ճանաչված օպերային երգչուհի, մեցցո-սոպրանո Վարդուհի Խաչատրյանը, որ ղեկավարում է «Ավետիս» հայ-շվեյցարական մշակութային կազմակերպությունն ու բարձրակարգ երաժշտություն քարոզում, Aravot.am-ին տեղեկացրել էր, որ այս տարվա իրենց բոլոր համերգները նվիրված են լինելու Կոմիտասի ծննդյան 150-ամյակին:
Aravot.am-ի հետ զրույցում Վարդուհի Խաչատրյանը նշեց, որ օրինակ, մարտի 29-ին Ժնեւի «Վիկտորիա Հոլում» կկայանա մեծանուն դաշնակահար Միխայիլ Պլետնյովի մենահամերգը: Համերգի վերջում նա Կոմիտաս կկատարի: Մեր զրուցակցից նաեւ տեղեկացանք, որ մայիսի 17-ին էլ տեղի կունենա մեկ այլ հայտնի դաշնակահարի՝ Խատիա Բունիաթիշվիլիի մենահամերգը, որտեղ էլ կհնչեն Կոմիտասի պարեղանակները:
Ի դեպ, Շվեյցարիայում լույս տեսնող ռուսալեզու պարբերականներից մեկն արդեն անդրադարձել է Միխայիլ Պլետնյովի` հայկական շնչով մենահամերգին, Կոմիտասի ստեղծագործություններին եւ դասական երաժշտության վառ ներկայացուցիչների մենահամերգների կազմակերպմամբ զբաղվող «Ավետիս» մշակութային միությանը:
Գոհար ՀԱԿՈԲՅԱՆ
