Այսօր կառավարության շենքի առջեւ Հայաստանի պետական տնտեսագիտական համալսարանի դասախոսները բողոքի ցույց անցկացրին՝ ընդդեմ բուհի ռեկտորի պաշտոնակատար Ռուբեն Հայրապետյանի: Դասախոսները դժգոհում են ընտրության կարգից՝ պնդելով, որ այն անօրինական է:
Լրագրողների հետ զրույցում դասախոս Գագիկ Ասլանյանն ասաց, որ բուհում կատարվող ապօրինությունների մասին իրենք փաստեր են ներկայացրել պատկան մարմիններ: Ասաց նաեւ, որ նամակով դիմել են վարչապետ Նիկոլ Փաշինյանին՝ որպեսզի իր հսկողության տակ վերցնի համալսարանի խորհրդի կողմից ընդունված այն կանոնակարգը եւ դրա հիման վրա հայտարարված թափուր դասաժամերի մրցույթը, որոնք մի շարք դրույթներով հակասում են համալսարանի կանոնադրությանը, Սահմանադրությանը եւ Աշխատանքային օրենսգրքին:
Դասախոս Արեւիկ Հովհաննիսյանի խոսքով, իրենք բաց նամակ են ուղարկել նաեւ Մարդու իրավունքների պաշտպանին, Կրթության նախարարին, բայց մինչ օրս որեւէ արձագանք չեն ստացել:
Պետական տնտեսագիտական համալսարանի մարկետինգի ամբիոնի ասիստենտ Հարություն Փափազյանի ներկայացմամբ, տնտեսագիտական համալսարանում դասախոս աշխատելու համար քննություններ են անցկացնում, որը «աբսուրդի» է նմանվում. «Աբսուրդը նրանում էր,որ մաթեմատիկա էին հարցնում եւ հարցնում են նրանք, որոնք չգիտեին մաթեմատիկան ինչ է: Բերում ասում էին՝ ածանցյալ հաշվեք, ֆունկցիա հաշվեք, կամ՝ միջին թվաբանական հաշվեկշիռ հաշվեք՝ իրենք չիմանալով: Կամ անգլերեն էին հարցնում»:
Կարդացեք նաև
Նրա խոսքով, այստեղ հավաքվածներից որեւէ մեկը դեմ չէ, որ այդ մրցույթն անցկացվի,բայց նրանք ուզում են, որ մրցույթը լինի ազատ անկախ. «Թափանցելիություն պետք է լիներ, մարդիկ մտնեին՝ տեսնեին, յուրաքանչյուրը ոնց է խոսում: Բայց հեչ թափանցիկ չէր»:
Տնտեսագիտականի դասախոսներին կառավարությունում ընդունեց նամակների բաժնի ղեկավար Ալեքսանդր Ղազարյանը:
Դասախոսները կրկին նամակ գրեցին իրենց դժգոհության վերաբերյալ:
Մանրամասները՝ տեսանյութում
Լուսինե ԲՈՒԴԱՂՅԱՆ
