Հայաստանի պետական տնտեսագիտական համալսարանի (ՀՊՏՀ) ազատված դասախոսների շահերը ներկայացնող փաստաբան Ալեքսանդր Կոչուբաեւը ֆեյսբուքի իր էջում տեղեկացրել էր, որ Երեւան քաղաքի դատախազ Գեւորգ Բաղդասարյանին հաղորդում է ներկայացրել ՀՊՏՀ ռեկտորի պաշտոնակատար Ռուբեն Հայրապետյանի կողմից՝ ՀՀ Քրեական օրենսգրքի մի շարք հոդվածներով նախատեսված հանցանքների կատարման հիմքով: Նա նաեւ պնդում էր, որ ՀՊՏՀ-ն այլեւս չունի ռեկտոր:
Aravot.am-ը թեմայի վերաբերյալ մեկնաբանություն խնդրեց ՀՀ կրթության, գիտության, մշակույթի եւ սպորտի նախարարության (ԿԳՄՍՆ) Բարձրագույն եւ հետբուհական կրթության վարչության պետ Ռոբերտ Սուքիասյանից:
«Հունիս ամսվա ընթացքում Հայաստանի պետական տնտեսագիտական համալսարանի կառավարման խորհուրդը որոշում է կայացրել, որ բարձրագույն ուսումնական հաստատության կազմակերպաիրավական ձեւի փոփոխություն են իրականացնում եւ առաջարկել է լիազոր մարմնին, որպեսզի ՊՈԱԿ-ներից վերափոխի, վերակազմակերպի հիմնադրամների:
Ներկայացված առաջարկությունը մեր կողմից ընդունվել է, եւ սահմանված կարգով այս պահին արդեն շրջանառվում է համապատասխան գերատեսչություններում: Ամփոփվելուց հետո կուղարկվի կառավարություն: Նաեւ Հիմնադրամների մասին օրենքով, այդտեղ ըստ որոշման, հիմնադիրը պետք է նշանակի պաշտոնակատար, օրենքով սահմանված կարգով խորհուրդ կձեւավորվի, որը կհայտարարի մրցույթ, ապա բուհը կունենա ռեկտոր»,-ասաց պարոն Սուքիասյանը:
Կարդացեք նաև
«Պետք է հիշենք, որ ոլորտը նաեւ կարգավորվում է նաեւ Բարձրագույն եւ հետբուհական մասնագիտական կրթության մասին օրենքով , որտեղ ասվում է, որ բուհերի ռեկտորներն ընտրվում են կառավարման համապատասխան օրենքով եւ բուհի կանոնադրությամբ սահմանված կարգով: Սա էլ այն օրենսդրությունը, որով մենք արդեն իսկ առաջնորդվում ենք: Շուտով կլինի կազմակերպաիրավական ձեւը, եւ սահմանված կարգով մրցույթ կհայտարարվի: Այսինքն` սա այն է, ինչ գրված է նախարարի հրամանում, որով նշանակվել է Հայաստանի պետական տնտեսագիտական համալսարանի ռեկտորի պաշտոնակատարը, այսինքն` մինչև օրենսդրությամբ սահմանված կարգով մրցույթի անցկացումը»,-հավելեց ԿԳՄՍՆ վարչության պետը:
Գոհար ՀԱԿՈԲՅԱՆ
Լուսանկարը` Ռոբերտ Սուքիասյանի ֆեյսբուքյան էջից:
