Այսօր լրագրողների հետ հանդիպման ժամանակ Հայաստանի կանաչների միության նախագահ Հակոբ Սանասարյանը հասցեական լուրջ մեղադրանքներ ներկայացրեց:
«Կառավարությունը հանքարդյունաբերության հարցում հակապետական վերաբերմունք ունի: Կամ սա բացարձակ տգիտության, կամ ուղղակի դավադրության արդյունք է: Իշխանությանը արդեն 30 տարի տիրանում են այնպիսի մարդիկ, որոնք սեփական երկրում սեփական քաղաքականություն վարելու իրավունք չունեն: Առանձին հարցերում կարող եմ զուգահեռներ բերել սկսած Անկախության առաջին օրից, թե պառլամենտում ինչպիսի հայտարարություններ արվեցին: Հանքարդյունաբերության վիճակը մինչեւ հիմա այս է: «Լիդիանը» այսօր փաստորեն զրկվում է հանքը շահագործելու արտոնությունից: Միջազգային առումով նա որեւէ հենարան չունի: Բաժնետերերը հեռանում են: Եվ պատահական չի, որ 2018 թ. հունվարին խոշոր բաժնետերերից մեկը նյույորքյան բորսայում հայտարարեց. «Ես չեմ հավատում, որ մոտ ապագայում Ամուլսարը շահագործվի: Հայերը աֆրիկացիներ չեն, որ ռազմական մի գեներալ ուղարկես՝ հարցը լուծի»: Օնտարիոյի դատարանը հիմա քննում է նրա սնանկացման խնդիրը: Ես ինչի՞ եմ ասում, որ երեւի կառավարության ներսում կան մարդիկ, որոնք, հավանաբար, իրական հանքատերերն են: Ու պարտադիր չի, որ վարչապետը լինի: Եթե «Լիդիանը» փակվեց, ծախսած գումարները, որ զգալի են, կորչում են: Եվ կառավարության ղեկավարը հայտարարում է. «Մենք իրավական որեւէ հիմք չունենք Ամուլսարի հանքավայրի շահագործումը դադարեցնելու»:
Լրագրողի հարցին, թե «Լիդիանի» հետ կապված դատական պրոցեսներում ինչ քայլեր են կատարվում, Հակոբ Սանասարյանը պատասխանեց. «Բնապահպանության եւ ընդերքի տեսչական մարմնի ղեկավարը Ամուլսարի հանքավայրի հետ կապված երկար ուսումնասիրություն կատարեց եւ դատարան ներկայացրեց 10 կետեր: Այսօր ՀՀ վարչական դատարանը ութ կետերը համարեց, որ իրավասու չի: Մնացել է երկուսը, այն էլ փաստաթղթերի հետ կապված: Այնտեղ նույնիսկ ապօրինի հանքօգտագործում է կատարվել առանց թույլտվության: Արթուր Գրիգորյանը, որ տեսչական մարմնի ղեկավարն էր, երբ պաշտոնից հեռացրին, գրեց, որ հենց առաջին օրվանից Տիգրան Ավինյանի կարգադրությամբ իր ձեռքով պետք է իրականացներ Ամուլսարի շահագործման թույլտվությունը: Այսօր Հայաստանի Հանրապետությունը միակ հենարանն է այս հանցագործ ծրագրի իրականացման համար»,- պատասխանեց բանախոսը:
Աշոտ ՀԱԿՈԲՅԱՆ