«Ճիշտ է առաջարկում, որպեսզի բոլոր ասեկոսեները վերանան»,-Aravot.am-ի հետ զրույցում ասաց ՀՀ ԶՈՒ գլխավոր շտաբի նախկին պետ Մովսես Հակոբյանն՝ անդրադառնալով գեներալ-գնդապետ Օնիկ Գասպարյանի՝ 44-օրյա պատերազմի քննիչ հանձնաժողով ստեղծելու առաջարկին:
Տարակուսանքին՝ մի կողմից հայտարարվում է, որ կատարվածի մասին իրական տեղեկատվություն հնարավոր չէ ստանալ գործող իշխանության պարագայում, մյուս կողմից էլ ասում եք՝ այս խորհրդարանը քննիչ հանձնաժողով ստեղծի եւ հետաքննություն իրականացնի, Մովսես Հակոբյանը հակադարձեց, որ հանձնաժողովն, ըստ կարգի, լինելու է պարիտետային: Նկատեցինք, որ գործող իշխանության ներկայացուցիչներն, ամեն դեպքում, որոշիչ դեր են ունենալու եւ եթե կան դրվագներ, որոնք իշխանական շրջանակները չեն ցանկանա, որ բացահայտվի, դժվար թե բացահայտվեն: Մովսես Հակոբյանն ասաց. «Դժվար չէ. մի քանի հոգի, ովքեր որ իրավիճակին տիրապետում են, կգնան հանձնաժողով եւ բոլոր փաստերը կներկայացնեն»:
Ի դեպ, խորհրդարանի այսօրվա քննարկումներում անուղղակի անդրադարձ եղավ նաեւ Մովսես Հակոբյանին ու նրա ունեցվածքին: «Իմ քայլի» պատգամավոր Արման Եղոյանն ասաց. «Ինչի հետ ենք մենք գործ ունեցել: Ես վերջերս եմ իմացել ու չեմ կարողանում իմ զարմանքը թաքցնել՝ մեր բանակի փառապանծ գեներալներից մեկը կառուցում է եռահարկ, հուշում են՝ քառահարկ առանձնատուն, չգիտենք ինչ փողերով, չգիտենք ում ուժերով: Բայց սա ամբողջ պատմությունը չի, նա այդ առանձնատունը վաճառում է մեր բանակի վրա: Այսինքն, մեր բանակը անհատից գնում է իր առանձնատունը՝ իր կարիքների համար ու նվիրում այդ նույն գեներալին, ով կառուցել է այդ առանձնատունը: Եթե գրվի կոռուպցիայի պատմության մասին գիրք, երեւի սա կլինի առաջին էջում՝ որպես հանճարեղ օրինակ: Այսօր ասում են՝ նախկիների օրոք ունեինք սա, նա…»:
Տարբեր առիթներով հայտարարվել է, որ Արման Եղոյանի ակնարկած գեներալը Մովսես Հակոբյանն է:
Կարդացեք նաև
Մովսես Հակոբյանն այս առնչությամբ ասաց, որ այդպիսի բան չկա, եւ այդ հայտարարությունն իրականությանը չի համապատասխանում. «Նայել եմ այդ տեսանյութը. պատգամավորը, որ ելույթ է ունենում, չգիտեմ ով է՝ ասում է՝ ասա, ասում է՝ չեմ ասի: Ինքը հասկանում է, որ ստում է եւ դրա պատասխանը պիտի տա: Դե, վախենում են անուն-ազգանունս տան, որովհետեւ գիտեն, որ դատի տամ, պիտի պատասխանեն: Դրանք հիվանդ մարդիկ են»:
Նելլի ԳՐԻԳՈՐՅԱՆ
