Այսօր կառավարության շենքի դիմաց մի քաղաքացի միայնակ բողոքի ցույց էր անում․ նա պահանջում էր չեղարկել սեպտեմբերի 21-ին նախատեսվող միջոցառումը, որն ինչպես վարչապետն էր ասել՝ լինելու է մասշտաբային եւ գունագեղ։
Կարմիր բերետավորները ցույց անող քաղաքացուն «Պահանջում ենք չեղարկել համերգը։ Հարգեք սուգը» գրառմամբ պաստառով կառավարության շենքի մոտից բերման ենթարկեցին:
Ոստիկանության լրատվական ծառայությունից Aravot.am-ին փոխանցեցին, որ այս պահին քաղաքացին ոստիկանությունում է, բայց նրան րոպեներ անց ազատ կարձակեն։ Ոստիկանությունից նաեւ տեղեկացրեցին, որ ցույց անող քաղաքացին չի հանդիսանում զոհված զինծառայողի հարազատ։
Կարդացեք նաև
44-օրյա պատերազմի զոհերի հարյուրավոր հարազատներ հայտարարություն էին տարածել, որով կառավարությանը կոչ էին հանում հրաժարվել սեպտեմբերի 21-ին գունագեղ միջոցառում կազմակերպելու մտադրությունից։ Նրանք այդ միջոցառումը համարել էին սրբապղծություն, նողկալի արարք:
Նելլի ԲԱԲԱՅԱՆ
