«Նյու Յորքում վերահաստատել եմ՝ ՀՀ-ն պատրաստ է վերսկսել ղարաբաղյան հակամարտության խաղաղ կարգավորման լիարժեք գործընթացը համանախագահության ձևաչափում հայտնի սկզբունքների և տարրերի հիման վրա»,-Չեխիայի ԱԳ նախարար Յակուբ Կուլհանեկի հետ համատեղ մամուլի ասուլիսի ժամանակ հայտարարեց ՀՀ ԱԳ նախարար Արարատ Միրզոյանը:
Արարատ Միրզոյանը հավաստիացրեց՝ հայ-չեխական հարաբերությունները հիմնված են երկու ժողովուրդների միջև փոխադարձ հարգանքի, երկուստեք առկա հետաքրքրությունների վրա: ՀՀ ԱԳ նախարարը հայտնեց՝ գործում է Հայ-չեխական տնտեսական համագործակցության միջկառավարական հանձնաժողովը, որն իր հինգերորդ նիստն առաջիկայում կունենա Երևանում:
Անդրադառնալով ԼՂ հակամարտության կարգավորման հարցում Չեխիայի դիրքորոշմանը՝ Արարատ Միրզոյանն ասաց. «ՀՀ-ն բարձր է գնահատում հակամարտության կարգավորման հարցում Չեխիայի դիրքորոշումը, որը համահունչ է ԵՄ դիրքորոշմանը, աջակցությանը ԵԱՀԿ Մինսկի խմբի համանախագահության ձևաչափով խաղաղ բանակցությունների շարունակությանը և հակամարտության երկարատև կայուն լուծման փնտրտուքին»:
Խոսելով սեպտեմբերի 23-ին և 24-ին Նյու Յորքում ունեցած հանդիպումների մասին՝ նա ասաց. «Նյու Յորքում ունեցա ԵԱՀԿ համանախագահների հետ հանդիպում, ինչպես նաև սեպտեմբերի 24-ին համանախագահների միջնորդությամբ Ադրբեջանի ԱԳ նախարարի հետ ունեցա հանդիպումներ, որոնք գալիս են փաստելու, որ հակամարտության խաղաղ քաղաքական կարգավորումը մնում է օրակարգում»:
Կարդացեք նաև
Տաթև ՀԱՐՈՒԹՅՈՒՆՅԱՆ
