Տավուշի մարզում նոյեմբերի 14-ին կայանալիք Իջևանի ՏԻՄ ընտրություններին տեղացիներից շատերը չեն էլ պատրաստվում մասնակցել:
Այս մասին մեզ հետ զրույցում նշեց Իջևանի ՏԻՄ ընտրություններին մասնակցող ուժերից «Հայ Յեղափոխական Դաշնակցության» ցուցակը գլխավորող Վահե Ղազումյանը, որն ընդգծեց, թե իր նախընտրական քարոզարշավի շրջանակներում տեղացիների հետ հանդիպման ժամանակ մեծ հիասթափություն է նկատել մարդկանց մոտ․
«Մենք որոշել ենք, որ թիմային այցեր չենք կատարելու և իրականացնում ենք անհատական այցեր գյուղերում և շրջաններում: Անկեղծ ասած՝ մարդկանց մեծ մասի մոտ լուրջ հիասթափություն կա քաղաքական դաշտից և հիմնականում մարդիկ չեն էլ ուզում գնալ ընտրություններին»:
Ղազումյանի փոխանցմամբ՝ բնակիչների մոտ նաև մեծ անհանգստություն կա Տավուշի սահմանային տարածքների հանձնման հետ կապված լուրերի առնչությամբ, որը հանգեցրել է նաև մեծ հիասթափության, ինչի պատճառով շատերը ցանկություն ունեն երկիրը լքելու․
Կարդացեք նաև
«Կա նաև ապրուստի լուրջ խնդիրը, որը համատարած բոլոր մարզերին է վերաբերում և Տավուշն էլ բացառություն չէ: Կա աշխատանքի լուրջ խնդիր, իսկ մթերքը գնալով թանկանում է, որը ավելի ծանր վիճակ է ստեղծում հատկապես ձմռանը: Մենք պետք է մարդկանց մեջ հույսը վերադարձնենք՝ այլ տարբերակով անհնար է ապրել»:
Ղազումյանը նաև նշեց, որ անգամ եթե իրենք չհաղթեն ընտրություններում՝ համագործակցելու են «Քաղաքացիական պայմանագիր» կուսակցության հետ, քանի որ իրենց մեջ չկա թշնամական տրամադրվածություն և բոլորն էլ ճանաչում են իրար և հարգում են․
«Իհարկե, կոալիցիա չենք կազմի, սակայն աշխատանքային համագործակցություն կլինի, քանի որ բոլորին շատ լավ ճանաչում եմ և մեր միջև թշնամական ոչ մի տրամադրվածություն չկա»։
Նշենք, որ նոյեմբերի 14-ին տեղի ունենալիք Իջևանի քաղաքապետի ընտրություններին մասնակցելու են «Հայ Յեղափոխական Դաշնակցություն» և «Քաղաքացիական պայմանագիր» կուսակցությունները։
Սաթենիկ ՀՈՎՍԵՓՅԱՆ
