«Երեւի վարչապետի համար այդ ձեւաչափը կորցրել է իր սրությունը, որովհետեւ եթե նախկինում մենք հանդիպում էինք ամեն ամիս ամրագրված օրերի, ապա հիմա հանդիպումներն արտահերթ են ու ավելի կարճ»,-Aravot.am-ի հետ զրույցում ասաց «Հայաստանի եվրոպական կուսակցության» նախագահ Տիգրան Խզմալյանը՝ անդրադառնալով վարչապետ Նիկոլ Փաշինյանի եւ արտախորհրդարանական քաղաքական ուժերի հետ հանդիպումներին։
«Նա մեզ հետ ավելի շատ հանդիպում է ինչ-որ կարեւոր գործողություններից առաջ։ Օրինակ՝ Նյու Յորք մեկնելուց առաջ կամ ՀԱՊԿ-ի հանդեպ նոր քաղաքականություն ձեւակերպելուց առաջ։ Այնպես որ, մենք քննարկում ենք հրատապ հարցերը։ Ափսոս, որ ժամանակ չի մնում ավելի հեռանկարային ու հիմնաքարային հարցեր քննարկելու համար, բայց, ըստ երեւույթին, այս պահի քաղաքականությունը պահանջում է արագ որոշումներ։ Մենք տեսնում ենք, որ հիմա դրանք ընդունվում են, եւ ես ուրախ եմ, որ կուսակցության տեսակետները տեղ են գտնում պետական քաղաքականության մեջ»,-հավելեց Տիգրան Խզմալյանը։
Լուիզա ՍՈՒՔԻԱՍՅԱՆ
