ՀՀ ժողովրդական նկարիչ Փարավոն Միրզոյանը պատրաստվում է հոբելյանական ցուցահանդեսի, որտեղ վերջին տարիների աշխատանքներն են ներկայացվելու։
Aravot.am-ի հետ զրույցում արվեստագետն ասաց, որ դրանից մեկն էլ թշնամու կողմից Բերձորի միջանցքի շրջափակման թեմայով է։
Ժողովրդական նկարիչն ասում է՝ շատ է ազդվել պատերազմից, իր խոսքով՝ մեր երկրի հանդեպ թշնամությունից ու այդ թեմաներով մի քանի կտավներ է ստեղծել։
«Բերձորի միջանցքը փակելու թեմայով աշխատանքը երկու շաբաթ առաջ է ստեղծվել։ Այնքան մեծ ցավ եմ ապրում, զարմանում եմ՝ ինչպե՞ս կարող է 21-րդ դարում Հայաստանն այսպիսի վիճակում հայտնվել․․․Միշտ մտածել եմ, որ 21-րդ դարը մեր երկրի ծաղկման, զարգացման համար բարենպաստ շրջան է լինելու։ Ափսոսում եմ, որ չկարողացանք օգտվել մեր հաղթանակների պտուղներից, չկարողացանք այնպես ղեկավարել մեր երկիրը, որ ավելի հզոր ու ավելի իմաստալից դառնար»,-ասում է Փարավոն Միրզոյանը։
Կարդացեք նաև
Ժողովրդական նկարիչը նշում է․ «Մեր ազգը տաղանդավոր ազգ է, գովելու համար չեմ ասում։ Գիտենք, որ կարող է քարից ցորեն ստեղծել, հաց քամել։ Այդ շնորհքը մեր ժողովուրդն ունի, դրա համար եմ ցավ ապրում, որ այսօր այս վիճակում ենք․․․Այս ամենը մեջս եռում էր, ու այս նկարը դրա համար ծնվեց։ Գիշերով եմ նկարել։ Ես ընդհանրապես չեմ նկարում գիշերները, ես լույսն եմ սիրում, առավոտ շուտ եմ ստեղծագործում․․․Բայց էլ չէի դիմանում․․․Ախր չորս կողմից գազանի նման հարձակվել են մի փոքր ժողովրդի վրա, աշխարհ, ի՞նչ ես ուզում։ Ես բոլորին եմ մեղադրում՝ Եվրոպայից մինչեւ Ամերիկա, բոլորին, որ այս հրաշալի ժողովրդին այդ օրն են գցել։ 120 հազար հայ մարդ Արցախում տանջվում է, չե՞ս ամաչում, աշխարհ, ի՞նչ ես ուզում այս ժողովրդից»։
Գոհար ՀԱԿՈԲՅԱՆ
Ցուցահանդեսի մասին՝ առաջիկայում։
