Գնահատված է, որ Ամուլսարի «Լիդիան Արմենիաի» աշխատանքը Հայաստանի ՀՆԱ-ն ավելացնելու է մեկ տոկոսով, դա շատ բարձր ցուցանիշ է և մենք իրավունք չունենք հրաժարվելու այսպիսի հնարավորությունից: Նման հայտարարություն արեց ՀՀ էկոնոմիկայի նախարար Վահան Քերոբյանն այսօր ՀՀ Կառավարության, Եվրասիական զարգացման բանկի և «Լիդիան Արմենիա» ՓԲ ընկերության միջև եռակողմ փոխըմբռնման հուշագրի ստորագրումից հետո ։
«Այս հուշագրով կողմերը իրենց նպատակադրումներն են հայտնում ներգրավել 150 միլիոն ԱՄՆ դոլար այս պայմանագրով և պայմանագրից դուրս՝ ևս 100 միլիոն դոլար, որը ներդրվելու է Ամուլսար հանքավայրի վերագործարկման ուղղությամբ: Գումարը ծախսվելու է շինարարական աշխատանքները ավարտին հասցնելու և անհրաժեշտ տեխնիկան ձեռք բերելու համար:
Կառավարությունը ստանալու է նոր ընկերության բաժնետոմսերի 12.5 տոկոսը և դրա դիմաց չի վճարելու որևէ բան՝ փոխարենն ապահովելու է գործարքի որոշակի ռիսկերից ապահովագրումը: Ազդակիր համայնքները, համաձայն այս պայմանավորվածության, ամեն տարի ստանալու են 7 միլիոն դոլարի աջակցություն ընկերության կողմից: ԵԶԲ-ն ներդնելու է 100 միլիոն դոլար՝ որպես վարկային միջոցներ, և ևս 50 միլիոն դոլար ապահովվելու է տեղական բանկի կողմից»,- նշեց Քերոբյանը:
Նրա խոսքով, սա իրենց համար կարևոր ծրագիր է, որը նույնիսկ ներառված է կառավարության միջոցառումների ծրագրում և իրենք շատ երկար ժամանակ են անցկացրել ընկերության մենեջմենտի հետ՝ ապահովելու ամենաբարձրակարգ ներդրողիների շրջանակը: Քերոբյանը վստահ է, որ այս ընկերությունը հարյուրավոր աշխատատեղեր կստեղծի ազդակիր համայնքներում և կապահովի էական տնտեսական աճ ողջ հանրապետության մասշտաբով:
Կարդացեք նաև
«Գնահատված է, որ Ամուլսարի «Լիդիան Արմենիայի» աշխատանքը Հայաստանի ՀՆԱ-ն ավելացնելու է մեկ տոկոսով, դա շատ բարձր ցուցանիշ է և մենք իրավունք չունենք հրաժարվելու այսպիսի հնարավորությունից »,-ընդգծեց Քերոբյանը։
Ի պատասխան լրագրողների հարցի, թե արդյո՞ք Ամուլսարի շուրջ տարիներ շարունակ գոյություն ունեցող բնապահպանական խնդիրները կարգավորված են, Քերոբյանը մի քանի անգամ կրկնեց, որ ընկերությունը պետության կողմից ստացել է բոլոր թույլատվությունները և որ արդեն 8 ամիս է՝ որևէ խոչընդոտ չկա գործունեության համար:
Քերոբյանն ավելի վաղ հայտարարել էր, որ կառավարությունը 250 միլիոն դոլարի համաձայնագիր կստորագրի «Լիդիան Արմենիա» ընկերության հետ, որին պատկանում է Ամուլսարի ոսկու հանքավայրի շահագործման լիցենզիան։
Լուսինե ՄԱՐԳԱՐՅԱՆ
հոյակապ որոշում մըն է… վերջապէ՛ս…
արդարեւ,
«Ամուլսարը անշուք քարի կտոր մըն է»
https://haytougchamlian.blog/ամուլսարը-քարի-կտոր-մըն-է/