Հակակոռուպցիոն դատարանում դատավոր Կարապետ Բադալյանի նախագահությամբ այսօր շարունակվեց բնապահպանության նախկին նախարար Արամ Հարությունյանի, նրա տիկնոջ եւ փեսայի դեմ Գլխավոր դատախազության ապօրինի ծագում ունեցող գույքի բռնագանձման գործերով վարչության ներկայացրած հայցադիմումի քննությունը՝ ապօրինի ծագում ունեցող գույքի բռնագանձման պահանջով։
Պատասխանող կողմի փաստաբանները միջնորդել էին կիրառել հայցային վաղեմություն, եւ այսօրվա նիստում դատարանին ներկայացրին դրանց հիմնավորումները։ Արամ Հարությունյանի եւ նրա տիկնոջ ներկայացուցիչ Արամ Օրբելյանը Aravot.am-ին նիստի ավարտին ասաց․ «Հայցային վաղեմություն կիրառելու միջնորդություն կիրառելը դատավարության այն միջնորդությունն է, որը երբ ներկայացնում ես, մնացած հարցերը սպասում են մինչեւ այդ հարցը վերջնական լուծում ստանա։ Դրա շրջանակներում ապացույց ենք ուսումնասիրում, հիմնավորումներ ենք ներկայացնում, որից հետո դատարանը կամ որոշում է կիրառել հայցային վաղեմություն եւ մերժում է հայցը, կամ որոշում է հայցային վաղեմություն չկիրառել եւ գործի քննությունը շարունակվում է»։
Հայցվոր կողմի ներկայացուցիչ Սիրո Ամիրխանյանը առարկեց պատասխանող կողմի միջնորդության դեմ եւ արտահայտեց միջնորդությունը մերժելու իր դիրքորոշումը։
Լսելով կողմերին՝ դատավոր Կարապետ Բադալյանը այսօր որոշում չընդունեց։ Նա գնաց խորհրդակցական սենյակ՝ միեւնույն ժամանակ հնարավորություն տալով պատասխան կողմին գրավոր տեսքով հավելյալ դիրքորոշում ներկայացնել, որից հետո որոշումը կհրապարակի օգոստոսի 4-ին։
Կարդացեք նաև
Աշոտ ՀԱԿՈԲՅԱՆ
