Հունվարի 19-ին նախ կայացավ «Հանրային ձայն» կուսակցության պատվավոր նախագահ Վարդան Ղուկասյանի («Դոգ») անձնական կյանքը ներկայացնող «Ամենափնտրված չհանցագործը» գրքի շնորհանդեսը, որին առցանց մասնակցում էր նաեւ ինքը: «Այդտեղ ինչ կարդալու եք, ոչ չափազանցրել ենք, ոչ էլ պակասացրել ենք…Ամեն մի տարեթիվ, ամսաթիվ, ամեն տող համապատասխանում է իրականությանը, ոչ մի բանի գեղարվեստական որակավորում չենք տվել»,-ասաց Ղուկասյանը: Հույս հայտնեց, որ գիրքը ձեռք բերած մարդիկ ավելի մոտիկից կճանաչեն իր իրական կերպարը, կհայտնվեն ռեժիսոր եւ հովանավոր, որոնք կցանկանան ֆիլմ նկարել: Նա նաեւ ասաց, որ հնարավոր է գիրքը շարունակություն ունենա:
«Ամենափնտրված չհանցագործը» գրքի հեղինակ, արձակագիր Սարգիս Գոքորյանը ներկայացրեց, թե ինչպես է ծնվել նման գիրք գրելու միտքը: Նրա ձեւակերպմամբ, Վարդան Ղուկասյանը քննարկված անձ է, սակայն հայտնի չէ այն ամենով, ինչ գրված է այս գրքում, եւ հիմնականում նրան գիտեն իր քաղաքական հայտարարություններով: «Ինձ մոտ հարց առաջացավ՝ ի՞նչ տեղի կունենա, եթե Վարդան Ղուկասյանից հանենք հայհոյանքը եւ ամբողջացնենք նրա կյանքը, եւ ի՞նչ կմնա Վարդան Ղուկասյանից: Արդյունքում՝ Վարդան Ղուկասյանից մնաց 200 էջ վավերագրություն, որը վստահ եմ՝ արժանի է ընթերցողի ուշադրությանը»,-նշեց Գոքորյանը:
Նրա ձեւակերպմամբ, գրքում հիմնովին անդրադարձ է կատարվում այն հանգամանքներին, որոնք Վարդան Ղուկասյանին ստիպել են զբաղվել քաղաքականությամբ. «Վարդան Ղուկասյանը պետք է բժիշկ դառնար, իսկ բանակը փոխեց ամեն ինչ»:
Կարդացեք նաև
Շնորհանդեսից հետո մեկնարկեց «Հանրային ձայն» կուսակցության կուսակցության արտահերթ համագումարը:
Համագումարի մասին՝ ավելի ուշ:
Գոհար ՀԱԿՈԲՅԱՆ
