ՀՀ նախկին վարչապետ Հրանտ Բագրատյանը «Հայելի» ակումբում խոսելով Տավուշից տարածքներ եւ գյուղեր Ադրբեջանին հանձնելու պարագայում ընդհանրապես պետականության լինելիությանը սպասվող սպառնալիքների մասին՝ ասաց. «Հարց է ծագում չէ՞: Եթե դու տալիս ես ու ոչինչ չես ստանում, անգամ երաշխավորված խաղաղություն չես ստանում, ինչի՞ ես այդ բոլորն անում: Յուրաքանչյուր հայ՝ երեւանցի, գյումրեցի, վանաձորցի, պետք է հասկանա, որ այս ամենն արվում է ռուսներին այստեղից տշելու համար: Ադրբեջանը սա շատ լավ հասկանում է եւ այս ընթացքում ավելի կմերձենա Ռուսաստանի հետ:
Հայ ժողովուրդ, դուք հասկանո՞ւմ եք, որ այս տարածքում, որ կոչվում է Հայաստան, լոգիստիկա կա: Ինչքան էլ Ֆրանսիան գոռա, ինքը չի կարող մեզ մոտենալ: Որպեսզի մեզ օգնի, մենք պիտի հասանելի լինենք, չէ՞: Մենք այս տարածքում հասանելի ենք թուրքերին եւ ադրբեջանցիներին, Ռուսաստանին՝ Վրաստանի եւ Իրանի միջոցով: Ուրեմն այստեղ պիտի գտնենք մեր քաղաքականության լուծումը:
Ինչ վերաբերում է Տավուշի գյուղերը տալուն, նորից եմ ասում՝ տալու ոչինչ չկա»,-ասաց պարոն Բագրատյանը եւ քարտեզի վրա ցույց տալով՝ բացատրեց, թե ինչ արհավիրքներ են սպասվելու Հայաստանին:
«Ինչի՞ են սկսում հենց Տավուշից: Այդտեղից ադրբեջանցիները դուրս են գալիս գազատարի եւ երկաթգծի վրա: Հայաստան մի գազատար է մտնում եւ մի երկաթգիծ: Հիշենք Ստեփանակերտի պատմությունը: Թուրքիան եւ Ադրբեջանը որպեսզի մեզ հաղթեն, պետք է զրկեն գազատարից, երկաթգծից»,-ասաց Հրանտ Բագրատյանը ու նաեւ տեղեկացրեց, որ Նիկոլ Փաշինյանը Թուրքիայի պահանջով թույլ է տալիս, որ Մեծամորի ատոմակայանը ամենաուշը մինչեւ 2027 թիվը փակվի:
Կարդացեք նաև
«Մենք մնալու ենք առանց գազի, առանց կապի, առանց հոսանքի: Մի քիչ կոպիտ կհնչի, բայց կատարյալ անուղեղ է պետք լինել սա չտեսնելու համար: Կտրելով կապը Վրաստանից՝ Նիկոլ Փաշինյանն իրականում կտրում է կապը Ռուսաստանից»,-ասաց նախկին վարչապետը եւ արձանագրեց, որ Հայաստանն իրականում գլխացավանք է Թուրքիայի համար, որովհետեւ Թուրքիան գտնվում է հայկական եւ հունական հողերի վրա: Եվ այս առումով, Ռուսաստանի դեմ պայքարում Արեւմուտքին պետք է այս տարածաշրջանում թուրքական բաստիոն: Ու այս առումով Արեւմուտքի եւ Թուրքիայի շահերը համընկնում են Ռուսաստանի եւ Իրանի դեմ պայքարում: Կենսաշահերի տեսանկյունից Արեւմուտքը Հայաստանի բարեկամը չէ եւ չի կարող լինել:
Անդրադառնալով հանրության անտարբերությանը տեղի ունեցողի նկատմամբ՝ Հրանտ Բագրատյանն ասաց, որ տարածքները Ադրբեջանին տալու եւ Ռուսաստանի դեմ աշխատելը շարունակելու դեպքում մենք կունենանք գործազրկություն 28-30 %, աղքատություն՝ 45-48 %: Եվ երբ խնդիրը ստամոքսի միջոցով կհասնի ուղեղին, այդ ժամանակ մեկ մարդու պես մարդիկ ոտքի կելնեն: «Բայց մենք ասում ենք. եկեք բանը դրան չհասցնենք, որովհետեւ մենք տեսնում ենք, թե ինչ է լինելու»,-ասաց պարոն Բագրատյանը:
Աշոտ ՀԱԿՈԲՅԱՆ
