«Ալմա-Աթայի հռչակագրի եւ խորհրդային վերջին շրջանների քարտեզների արձանագրմամբ շատ որոշակի է դառնում, որ այն տարածքը, որը պատկանում է Հայաստանի Հանրապետությանը, այդտեղով պետք է սահմանագծումն արվի այնպես, որ այդ տարածքները մնան ՀՀ տիրապետության տակ»,- Ազգային ժողովում լրագրողների հետ ճեպազրույցում ասաց ՔՊ խմբակցության պատգամավոր Սարգիս Խանդանյանը։
Հարցին, որ Տավուշում մարդիկ դեմ են այս գործընթացներին, ինչպե՞ս է իշխանությունը միակողմանի իրականացնում այս գործընթացը, Խանդանյանը պատասխանեց․ «2021 թվականին Հայաստանում տեղի են ունեցել արդար, ազատ եւ թափանցիկ ընտրություններ, ընտրությունների միջոցով ձեւավորվել է խորհրդարան, որը ձեւավորել է կառավարություն։ Եվ այդ կառավարությունն ունի լիազորություն խաղաղության օրակարգով ջանքեր գործադրել՝ խաղաղության հասնելու համար։ Եվ անում է հենց դա։ 2026 թվականին տեղի կունենան ընտրություններ, եւ քաղաքացիները կրկին կտան իրենց գնահատականը։ Եվ, այո, իսկապես ես էլ իմ ձեռքերը կկտրեմ եւ Տավուշից ոչինչ չեմ տա, որովհետեւ այս պահին Տավուշից ոչ ոք ոչինչ չի տալիս։ Հիմա տեղի է ունենում սահմանազատման գործընթաց՝ երկու կողմերի միջեւ բանակցված եւ համաձայնեցված»։
Ըստ նրա՝ այս փուլում սահմանազատման հանձնաժողովները որոշել են սահմանազատումն սկսել այն հատվածներից, որտեղ եղել են բնակավայրեր․ «Դրանք վերաբերում են Ադրբեջանի 4 գյուղերին, բայց հետագայում ամբողջ սահմանի երկայնքով պետք է իրականացվեն, ձեր նշած հարցերը եւս բարձրացվեն եւ լուծվեն»։
Դիտարկմանը, որ Ադրբեջանը պատրաստ չէ զիջումների, Խանդանյանը պատասխանեց․ «Ես համաձայն չեմ այդ մեկնաբանության հետ։ Նախ պարտավորվում է, որ սահմանազատման գործընթացը շարունակվելու է Ալմա-Աթայի հռչակագրի հիման վրա եւ խորհրդային վերջին քարտեզներով, նաեւ զուգահեռ զինված ուժերը հետ են քաշվելու, տեղակայվելու են սահմանապահ ուժեր»։
Կարդացեք նաև
Սարգիս Խանդանյանն ասաց, որ հաջորդ փուլում «անկլավների եւ էքսկլավների» սահմանների սահմանազատումն է իրականացվելու։
Ռոզա ՀՈՎՀԱՆՆԻՍՅԱՆ
