«Չենք եկել մեզ ցուցադրելու համար, եկել եք պահանջատեր այն երկրներից, այն Եվրոպայից, ում աչքի առաջ եղել է ցեղասպանություն, ում աչքի առաջ Արցախը հայաթափվել է: Այսօր սրանք ինչի՞ համար են այստեղ հավաքվել, ի՞նչ նոր փորձանք են մեր ժողովրդի գլխին բերում: Սրանց բոլոր ներկայացուցիչները այդ հանցագործության մասնակիցներ են, որովհետեւ ո՛չ քննադատել են ցեղասպան Ալիեւին, ո՛չ էլ տեր են կանգնում ժողովրդի իրավունքներին»,- այսօր Երեւանում անցկացվող ԵՄ գագաթնաժողովի մասնակից եվրոպացի առաջնորդների այցին անդրադառնալով՝ ասաց «Վերածնվող Արցախ» հ/կ նախագահ Անաստաս Իսրայելյանը:
Նա նույնպես այս իշխանությունների հակաժողովրդավարական գործունեության ու արցախահայերի իրավունքների պաշտպանության հարցերը բարձրաձայնելու համար կազմակերպված բողոքի ցույցի մասնակիցներից էր:
Կարդացեք նաև
«Մենք այստեղ ենք ասելու, հերիք է՝ էս ժողովրդին խաբեք, եթե աշխարհում թույլ եք տալիս պատերազմ լինի ու ցեղասպանությունը կրկնվի, դուք այդ ցեղասպանության մասնակիցներն եք, հանցագործներ: Եկել եք այսօր այստեղ աջակցելու մի ղեկավարի, որը դավաճանեց սեփական ժողովրդին: Ի՞նչ ղեկավարություն ու ի՞նչ աշխարհի արդարություն: Չկա՛ իրավունք, չկա՛ ժողովրդավարություն, ամեն ինչ ոտնահարված է»:
Իսրայելյանը նաեւ նկատեց, որ եթե ժողովրդավար պետության առաջնորդ ներկայացողները չեն կարողանում Բաքվում պահվող հայ պատանդների իրավունքները վերականգնել, էլ ինչ հարցեր կարող են նրանք լուծել. «Ի՞նչ հարցում կարող եք դուք օգտակար լինել»:
Նա նաեւ հավելեց՝ Արցախի հարցը փակ չէ, ու ոչ մեկը չի կարող արցախցու իրավունքը խլել ու վաճառել:
Հիշեցնենք, որ քաղաքացիներն այսօր ամբողջ օրվա գրաֆիկով բողոքի ցույցեր են անցկացնելու Կարեն Դեմիրճյանի անվան մարզահամերգային համալիրի մոտակայքում, որտեղ անցկացվում է ԵՄ գագաթնաժողովը, որին մասնակցում են ՀՀ եկած եվրոպական գերտերությունների բարձրաստիճան պաշտոնյաներ, պատվիրակություններ:
Արփինե ՍԻՄՈՆՅԱՆ
