«Դժվարությամբ, երբեմն նույնիսկ հույսի վերջին կաթիլը պահելով՝ հաղթել ենք ֆաշիզմը ու ձեռք ենք բերել ինքնիշխան, մեր հայրենիքում ապրելու իրավունք: Եթե ճիշտ աշխատենք ու զարգացնենք մեր երկիրը, կունենանք հաղթանակ: Այսօր ուզում են հայ եւ հաղթանակ բառերն իրարից հեռացնել: Մեր ենթագիտակցության մեջ ուզում են նստեցնել, որ չենք կարող այլեւս ունենալ հաղթանակ»,- այսօր Հաղթանակի զբոսայգում լրագրողների հետ զրույցում ասաց «Ուժեղ Հայաստան» կուսակցության խորհրդի անդամ Նարեկ Կարապետյանը:
Հիշեցնենք, որ մայիսի 9-ը տարիներ շարունակ Հայաստանում նշվել է որպես Եռատոն՝ Հայրենական մեծ պատերազմում տարած հաղթանակի, Շուշիի ազատագրման եւ Արցախի Պաշտպանության բանակի կազմավորման օր: Այսօր Եռատոնից մնացել է սոսկ Հաղթանակի օրը:
Կարապետյանի խոսքով՝ մեր սխալն է եղել, որ մեր երկրի անվտանգությունը վստահել ենք այս իշխանություններին, օր առաջ պետք է ուղղենք մեր սխալը. «Էլ չվստահենք մեր երկրի անվտանգությունը: Ամեն անգամ սխալվելուց , ասում են սխալվեցինք, բայց չի կարելի ներել այդքան սխալներ, եթե այդ սխալներն արժեք ունեն, իսկ արժեքը հազարավոր զոհերն են»:
Կարդացեք նաև
Անդրադառնալով Անգեղակոթը ասֆալտապատելու մասին Նիկոլ Փաշինյանի հայտարարությանը՝ Կարապետյանն ասաց՝ Սիսիանի շրջանը Հայաստանի ամենամեծ գործազրկություն ունեցող շրջաններից է. «Աղքատություն էր մասսայական: Ի՞նչ ռեմոնտ, ի՞նչ ասֆալտ, պետք է աշխատանքով ապահովել: Իսկ պարտք վերցնել ու ռեմոնտ անել, բոլորը կարող են»:
Արփինե ՍԻՄՈՆՅԱՆ
