«Օրենքի երկիր է, ինչպես անեմ, իմ հարցը ինչպես լուծեմ»,- այսօր Քանաքեռ-Զեյթուն վարչական շրջանում իր դժգոհությունն այսպես բարձրաձայնելով` դեպի վարչապետ Նիկոլ Փաշինյանն էր շտապում մի քաղաքացի: Սակայն Փաշինյանի կողմնակիցները խոչընդոտում էին նրա ճանապարհը, հորդորում դիմել վարչապետի օգնականին:
«Վարչապետը լիազորված չէ դատական նիստերի մասին խոսել»,- քաղաքացուն վստահեցնում էր վարչապետի օգնականը:
«Այսինքն դա լուծվող հարց չէ՞, չեմ հասկանում՝ ինչ է կատարվում: Ես հեղափոխություն եմ ուզել, իմ աշխատանքային իրավունքը խախտվել է, դատարանով վերականգնվել եմ, Վճռաբեկի որոշմամբ՝ ինձ թույլ չեն տալիս աշխատել: 5 տարի դատարանների դռներն եմ, ապօրինի հեռացրել են աշխատանքից: Սա օրենքի երկիր է»,- շարունակեց քաղաքացին:
Ավելի ուշ ՔՊ-ական Արման Եղոյանը դժգոհող տիկնոջը ուղեկցեց ընդդիմադիր լրատվամիջոցներին հարցազրույց տալու ու կշտամբեց տիկնոջը, թե ինչու է լրատվամիջոցների առաջ հանգիստ պատմում, իսկ իրենց հանգիստ չէր կարողանում պատմել:
Կարդացեք նաև
«1990 թվականից որպես բուժքույր աշխատել եմ ՀՀ առողջապահության նախարարության Ֆանարջյանի անվան ուռուցքաբանության ազգային կենտրոնում: Ես եղել եմ ակտիվ հեղափոխական, ընտրել եմ թավշյա հեղափոխությունը, բայց 2021 թվականին ՝ հեղափոխության օրոք բժշկական կենտրոնի տնօրեն ընտրված «բեսպրեդել» Նարեկ Մանուկյանը կամայական կադրային ջարդ իրականացրեց, հեռացրեց բազմաթիվ աշխատակիցների: Երեկ հանդիպել եմ առողջապահության նախարարի հետ, հայտնել եմ խնդրիս մասին, բայց նա անբավարար պատասխան է տվել, որը վայել չէ նախարարին: Նախարարն ինձ ասում է՝ 2018 թվականին նախկիններն ուզում էին այդ հիվանդանոցը կոպեկներով վաճառել: Ես հեղափոխություն եմ ուզել, որ օրենքը գերիշխի, ես հակառակ պատկերն եմ ստացել»:
Քաղաքացին պատմեց, որ սոցիալական խնդիրներ ունի ու հեգնեց Փաշինյանի որակումը. «Փաշինյանն ասում է՝ հպարտ քաղաքացի: Ես ամենեւին հպարտ չեմ: Ավելի քան 30 տարի եղել եմ նվիրված աշխատող, իսկ այսօր բեռ եմ դարձել պետության համար: Վարչապետը միայն մեզ հետ հանդիպում է միայն ձայների համար: 5 տարի պայքարել եմ՝ հանդիպեմ նախարարին, բայց չի հաջողվել։ Իսկ երեկ էլ հեգնանքով ասում է՝ թե գործատուն ազատ է իր որոշումների մեջ։ Այսինքն հասկացա՝ պետական հաստատությունը, որը գործատու է նշանակել իր կողմից, կարող է կամայական օրենքներով առաջնորդվել»:
Արփինե ՍԻՄՈՆՅԱՆ
