«Չի լինի նախկին համակարգին վերադարձ», – ասում են տարբեր քաղաքական ուժերի ներկայացուցիչները: Նախեւառաջ, իհարկե, ՔՊ-ն: Իբր, կան «մութ» ուժեր, որոնք երազում են «հին համակարգին» վերադառնալու մասին, իսկ ահա նրանք՝ ՔՊ-ականները, կրծքով կպաշտպանեն իրենց ստեղծած «նոր համակարգը»: Դա հերթական բլեֆն է. մեզ փորձում են համոզել, որ համակարգը փոխվել է: Բայց իրականում մենք ապրում ենք նույն համակարգում, որը ստեղծվել է տասնամյակներ առաջ:
Ոչ մեկի «թաթիկները չեն կտրվել», պարզապես երբեմն, երբ «թաթիկներով մարդիկ» Փաշինյանին դուր չեն գալիս, նրանց հասցեին դատարկ սպառնալիքներ են հնչում: Նշեմ նաեւ, որ եթե «հին թաթիկներն» այս ընտրություններում «աշխատեն» ՔՊ-ականների համար, ինչպես որ աշխատել են ՀՀԿ-ի համար (գիտենք, թե ինչպես), ապա նրանց հասցեին սպառնալիքներն իրականություն չեն դառնա: Բնականաբար, առաջացել են բազմաթիվ ՔՊ-ական եւ ՔՊ-ամերձ «նոր թաթիկներ»:
Եվ եթե դուք կարծում եք, որ նրանք «պերաժկի ուտող են», ապա չարաչար սխալվում եք: Նրանք դոլարային միլիոնատերեր են, պարզապես ձեւեր են թափում, թե իբր «դուրս են եկել ժողովրդի ծոցից»: Կոռուպցիայի, «թալանը ժողովրդին վերադարձնելու» մասին նրանց խոսակցությունները, հավանաբար, հաճելի են լյումպենի ականջի համար: Եթե իրենց «ժողովուրդը» հավատում է, որ, ասենք, Քոչարյանը 4 միլիարդ դոլար ունի, ապա ինչո՞ւ չեն հարցնում՝ այդ 4 միլիարդից ո՞ր մասն է «վերադարձվել ժողովրդին»: 2018-ին էլ Քոչարյանը 4 միլիարդ ուներ, հիմա՞ էլ ունի:
Ե՛վ առաջ, ե՛ւ հիմա օլիգարխները, իշխանավորները, նրանց բարեկամները մեզ՝ սովորական մարդկանց, իրապես համեստ ապրելակերպ ունեցող քաղաքացիներիս, ինչպես «համբալ» համարել են, այնպես էլ շարունակում են «համբալ» համարել՝ որքան էլ «սրտիկներ» ցույց տան։ Եվ հենց դա՛ է համակարգը չփոխվելու ամենաառաջին ցուցանիշը։
Կարդացեք նաև
Դատական համակարգն էլ չի փոխվել՝ հատուկենտ պարկեշտ պրոֆեսիոնալների կողքին կան բոլոր իշխանությունների գրպանում գտնվողները, ինչպես նաեւ երիտասարդներ, որոնք արագ հասկացել են, թե ինչպես է պետք կատարել «վերեւների» պատվերները։ Նույնը՝ քննիչները, ոստիկանները, դատախազները, ԱԱԾ-ականները: Նրանք բոլորը հին՝ տասնամյակներ գոյություն ունեցող համակարգի ներկայացուցիչներ են։
…Ընդդիմադիր քաղաքական ուժերը, կարծում եմ, պետք է խոսեն ոչ թե «հին համակարգին չվերադառնալու»՝ «վերադառնում են» մի բանի, որը վերացել է, գոյություն չունի, այլ նոր համակարգ ստեղծելու մասին:
Արամ ԱԲՐԱՀԱՄՅԱՆ
