«Մեր միջնորդությունն է պահանջել ԿԸՀ-ից տրամադրել բոլոր 2005 տեղամասերի արձանագրությունները՝ կամ ֆիզիկական կրիչի տեսքով, կամ առնվազն էլեկտրոնային տարբերակով»,- ՍԴ նիստի ընթացքում, որտեղ քննվում է հունիսի 7-ին կայացած ընտրությունների արդյունքների վերաբերյալ ԿԸՀ որոշման դեմ 7 կուսակցությունների ներկայացրած դիմումները, որոնցով վիճարկվում են խորհրդարանական ընտրությունների արդյունքները, ՔՊ-ի միջնորդությունը ներկայացրեց ՔՊ ներկայացուցիչ Սուրեն Գրիգորյանը։
Նա հայտնեց, որ հետևյալ տրամաբանությամբ են նման միջնորդություն ներկայացնում․ «Պարոն Օրբելյանն առաջ է տանում այն տրամաբանությունը, որ ԿԸՀ-ի հաշվարկները արժանահավատ չեն և բերում է օրինակներ։ Առանձին օրինակներով հավակնում է, որ բարձր դատարանն ընդհանուր հաշվարկներն անարժանահավատ ճանաչի»։
ԲՀԿ ներկայացուցիչ Արամ Օրբելյանը պարզաբանեց․ «Երկու շտկում՝ ես ցույց եմ տվել, որ հենց այդ տվյալներով, որոնք առկա են ԿԸՀ-ի աղյուսակի մեջ, առկա է 269 ավել քվեաթերթիկ։ Միևնույն ժամանակ՝ երկու կետով խնդիր էի բարձրաձայնել, որ այդտեղ կան խնդիրներ։ Հետևաբար, ես միանում եմ՝ այդ տվյալները թող տան, որ հետագայում ավելի մանրամասն վերլուծություն լինի, բոլորիս մոտ հասանելի լինեն, բայց նաև արձանագրում եմ, որ տվյալ քաղվածքներն իմ բերած խնդիրներից ոչ մեկին չեն անդրադառնալու։ Իմ վերլուծությունը վերաբերում է հենց աղյուսակում եղած տվյալներին, որոնք, ենթադրում եմ, որ վերցված են հենց արձանագրություններից»։
Կարդացեք նաև
ՍԴ դատավոր Արթուր Վաղարշյանը հարցրեց՝ Դուք կո՞ղմ եք, որ այդ տվյալները տրամադրվեն։ Արամ Օրբելյանը պատասխանեց․ «Ես կողմ եմ, բայց ոչ այն հիմնավորմամբ, ինչով պահանջում են»։
Նշենք, որ ժամը 22։10-ին մեկնարկել է ՍԴ աշխատակարգային փակ նիստը։ Այստեղ կքննարկվի և որոշում կկայացվի՝ ՍԴ նիստի շարունակությունը կանցկացվի փակ ընթացակարգով, թե՝ ոչ։
ՍԴ-ում 7 ուժերի ներկայացրած դիմումի քննությունն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
