Ավստրալիան ընդունել է «News Bargaining Incentive» օրենքը, որի համաձայն՝ խոշոր տեխնոլոգիական հարթակները («Meta», «Google», «TikTok» և «LinkedIn») կվճարեն 2.5% տուրք իրենց տեղական գովազդային եկամուտներից, եթե ավստրալական ԶԼՄ-երի հետ առևտրային համաձայնագրեր չկնքեն։ Այդ համաձայնագրերի ֆինանսական արժեքը հաշվարկվելու է ընկերության վճարային պարտավորության դիմաց։ Օրենքը տարածվում է այն սոցհարթակների վրա, որոնց գովազդային եկամուտը Ավստրալիայում գերազանցում է 250 մլն ավստրալական դոլարը։
Տուրքից խուսափելու համար սոցհարթակները պետք է հաշվետու ժամանակաշրջանի ավարտից առաջ առնվազն 8 տարբեր ԶԼՄ-երի հետ համաձայնագիր կնքեն։ Միաժամանակ օրենքը նախատեսում է տարբեր չափի ԶԼՄ-երի համար տարբեր խթաններ. խոշոր ԶԼՄ-երի հետ կատարված ծախսերը հաշվարկվելու են 150% չափով, իսկ փոքր և միջին ԶԼՄ-երի դեպքում՝ 200% չափով։ Միևնույն համաձայնագրի հաշվարկային արժեքը չի կարող գերազանցել հարթակի վճարային պարտավորության 25%-ը։ Օրենսդրական կարգավորման նպատակն է ստեղծել տնտեսական խթան, որ խոշոր թվային հարթակները ուղղակիորեն ֆինանսական հարաբերություններ ձևավորեն տեղական ԶԼՄ-երի հետ և փոխհատուցեն այն լրատվական բովանդակության արժեքը, որը նպաստում է սոցհարթակներում օգտատերերի ներգրավվածությանը և գովազդային եկամուտների ձևավորմանը։
Հեռուստատեսության և ռադիոյի հանձնաժողով
