«Ես հստակ ասում եմ, եթե Միացյալ Նահանգները վերադառնա փոխըմբռնման հուշագրում ստանձնած իր պարտավորություններին, Իրանի Իսլամական Հանրապետությունը անմիջապես կպատասխանի դրան: Ի տարբերություն Ամերիկայի, իմ երկիրն ունի իր միջազգային պարտավորությունները կատարելու հիանալի փորձ և միշտ գործել է միջազգային իրավունքի սկզբունքներին համապատասխան», – «ՇՀԿ+» ձևաչափով հանդիպման ժամանակ իր ելույթում հայտարարեց Իրանի նախագահ Մասուդ Փեզեշքիանը՝ հիշեցնելով, որ Պակիստանի և Կատարի միջնորդությամբ գրեթե երեք ամիս տևած բանակցությունները հանգեցրել էին Իսլամաբադի փոխըմբռնման հուշագրի ստորագրմանը, սակայն ԱՄՆ-ի պարտավորությունը ԱՄՆ նախագահի ստորագրությամբ փաստաթղթի նկատմամբ տևեց երկու շաբաթից էլ պակաս։
Մասուդ Փեզեշքիանը հիշեցնում է՝ Իրանը չի եղել ԱՄՆ-ի հետ պատերազմի նախաձեռնողը, բայց դիվանագիտությունն ու բանակցությունները նախկինի պես համարում է տարաձայնությունների կարգավորման հիմնական ուղին, սակայն պետք են պայմանավորվածությունների կատարման արդյունավետ երաշխիքներ։
Իրանի նախագահը նաեւ նկատեց՝ անվտանգությունն ու զարգացումը անբաժանելի են, բայց կազմակերպությունը միաժամանակ պետք է լուծի նաեւ տնտեսական խնդիրներ՝ բազմաբեւեռության գործում արդյունավետ դեր խաղալու համար։
Իրանի նախագահը Շանհայի համագործակցության կազմակերպության համար երեք տնտեսական նախաձեռնություն առաջարկեց՝ ֆինանսական և բանկային համագործակցության խորացում, ներառյալ ազգային արժույթների ավելի լայն օգտագործումը և ՇՀԿ բանկի ստեղծումը, ՇՀԿ արտահանման ապահովագրության և ներդրումների միության ստեղծում և ՇՀԿ էներգետիկ կոնսորցիումի ձևավորում։ Բացի այս, Իրանի նախագահը կարեւոր է համարում, որ ստեղծվի ՇՀԿ ռազմավարական անվտանգության ուսումնասիրությունների կենտրոն և ՇՀԿ անդամ պետությունների խորհրդարանական ֆորում։
Կարդացեք նաև
Ամբողջական տեսանյութը՝ այստեղ
Պատրաստեց Նելլի ԳՐԻԳՈՐՅԱՆԸ
