Այսօր «Թեքեյան կենտրոնում›› բացվեց լուսանկարչական ցուցահանդես` կենտրոնի հիմնադրամի, Հայ լուսանկարիչների ազգային ասոցիացիայի եւ PhotoPodium.com-ի հովանավորությամբ:
Լուսանկարչական ցուցահանդեսի խորհուրդը ցեղասպանության 100 տարելիցն էր, որտեղ ներկայացված էր հինգ երկրի ՝ Հայաստանի, Վրաստանի, Ռուսաստանի, ԱՄՆ-ի, Սիրիայի երեսունմեկ լուսանկարչի, ավելի քան յոթանասուն աշխատանքներ , որտեղ կային նաև օտարազգի լուսանկարիչների գործեր: Ցուցահանդեսին ներկա էին արվեստի գործիչներ, լուսանկարիչներ, Մայր Աթոռ Սուրբ Էջմիածնից ներկայացուցիչ:
Արմեն Ծուլիկյանը, որը «Թեքեյան Կենտրոն» հիմնադրամի տնօրենն է, մինչ ցուցահանդեսի բացումը ողջունեց ներկաներին, և իր երախտիքի խոսքը ուղղեց մասնակից լուսանկարիչներին: Նրա խոսքով ցուցահանդեսը բացառիկ առիթ է, նաև` ուրախալի , քանի որ այն միջազգային հանրության ուշադրությունը ևս մեկ անգամ բևեռում է Հայոց մեծ եղեռնի հարուրամյա տարելիցին: Այն փաստում է, որ աշխարհը անտարբեր չէ 100 տարի առաջ գործած ոճիրի նկատմամբ. «Ցուցահանդեսը իր իմաստով բավականին խորն է: Ցավում եմ, որ ոչ բոլոր մասնակիցներն են կարողացել ֆիզիկապես այսօր այստեղ գտնվեն, բայց նրանք այստեղ են` իրենց աշխատանքներով: Մենք այսօր տեսնում ենք բավականին գնահատելի ու խորիմաստ աշխատանքներ»:
Կարդացեք նաև
Արմեն Ծուլիկյանը նաև նշեց, որ այս ցուցահանդեսը տարբերվում է մյուսներից, քանի որ մրցույթ է անցկացվել, և եղել են հաղթողներ, որի մասին մասնակիցները նույնիսկ տեղյակ չէին :
«Թեքեյան Կենտրոն» հիմնադրամի հոգաբարձուների Խորհրդի նախագահ Վարդան Ուզունյանը, որը Հայաստանում է գտնվում Ցեղասպանության հարուրամյա տարելիցի կապակցությամբ, առաջին երեք տեղը զբաղեցրած մասնակիցներին հանձնեց պատվոգիր և խրախուսական մրցանակներ:
Ցուցահանդեսի մասին իր կարծիքը հայտնեց նաև Հայ լուսանկարիչների ազգային ասոցիացիայի նախագահ Սերգեյ Հակոբյանը: Նրա խոսքով թեման արդեն իսկ հետաքրքիր է դարձնում ցուցահանդեսը, հատկապես, երբ այդ թեման մեզ համար շատ կարևոր է: «Հիշողությունը մարդկային զգացողություններից է , որը ուղեկցում է բոլորիս կյանքի ընթացքում: Այս լուսանկարներում մենք տեսնում ենք հիշողություն` երիտասարդ օրերի, հարազատների, ապրած դժվարությունների մասին»,- նշում է Սերգեյ Հակոբյանը և հավելում, որ ցուցահանդեսը կարևոր է նաև նրանով, որ հայաստանյան լուսանկարչությունը հետաքրքիր վերելք է ապրում:
Նա շնորհակալություն հայտնեց լուսանկարիչներին, ովքեր բարդ պայմաններում փորձում են ինչ-որ բան անել` արվեստը շարունակական դինամիկայի մեջ պահելու համար: Իսկ հիմնադրամի ցուցահանդեսների կազմակերպման գործում մեծ ավանդ ունեցող Հովհաննես Բադալյանը ցավով նշեց, որ ցուցադրված 70 նկարներից Արարատի ոչ մի լուսանկար չկար, բայց հույս հայտնեց, որ հաջորդ ցուցահանդեսին անպայման կլինի: Նա հիշեց նկարիչների տան ցուցահանդեսներից մեկի ժամանակ ներկայացված Արարատի մի լուսանկար, ,որը խորհդանշական է եղել իր անունով`«Սուրբ Մասիսի փեշերի տակ մենք տուն ունենք անխորտակ»: Եվ Հովհաննես Բադալյանի կարծիքով այսօրվա ցուցահանդեսը պետք է լիներ հենց Արարատի ոգով:
Լաուրա ՄԱՄՅԱՆ
