Ծանր ու երկարատեւ բացակայությունից հետո երեկ խորհրդարան վերադարձավ Վանո Սիրադեղյանը։ Բարեւեց Արա Սահակյանին։ Մտավ Բաբկեն Արարքցյանի առանձնասենյակ։ Հրաժարվեց լրագրողների հետ սուրճ խմել. «Ուզում եք խոսք քաշե՞լ»։
Առավոտյան դատախազություն էր գնացել։ Նախապես հայտարարված ասուլիսը հետաձգեց՝ պատճառաբանելով նախընտրական հանդիպումները։ Այսօր, դարձյալ առանց լրագրողների, մեկնելու է Տավուշ՝ իր նախընտրական շտաբը ձեւավորելու եւ աշխատանքային այլեւայլ հարցեր լուծելու։
ՊԱՅՄԱՆԱԳՐԱՅԻՆ ՓՈԽՀԱՐԱԲԵՐՈՒԹՅՈՒՆՆԵՐ
Կարդացեք նաև
«Արդյունքները սպասվածից ավելին են։ Օրական կնքվում է 10-15 հազար պայմանագիր ընտրողների հետ։ Եվ այժմ արդեն 100 հազարն անցել ենք, գուցե այդ պատճառով շատ-շատերին այդ երեւույթը դուր չի գալիս»,- «Առավոտին» ասաց «ԱԻՄ+» նախընտրական շտաբի ղեկավար Մեխակ Գաբրիելյանը։ Մեր այն հարցին, թե բոլոր պայմանագիր կնքածները պարտավորվե՞լ են իրենց ձայնն «ԱԻՄ+»-ին տալ, պրն Գաբրիելյանը պատասխանեց. «Բնականաբար»։
Կարդացեք նաեւ 2-րդ էջ։
ՊԱՌԱՎԱՔԱՐ+
Թիվ 13 ընտրատարածքում՝ Նալբանդյան-Իսահակյան հատույթում կիրակի օրը հարձակման է ենթարկվել «ԱԻՄ+» դաշինքի անդամ Ասյա Պապայանը։ Ընտրատարածքի ընտրողների ցուցակները ստուգելուց հետո Ասյա Պապայանը երեկոյան դուրս է եկել շենքից. անհայտ երկու տղամարդ հարձակվել-խլել են տիկին Ասյայի պայուսակը եւ գողացել ընտրողների ցուցակները։ Կուսակցությունը նույն օրը դիմել է ոստիկանություն։ Բացահայտման ուղղությամբ գործին ընթացք չտալու պատճառով «ԱԻՄ+»-ը ստիպված դիմել է դատախազություն։ Եթե գործը դարձյալ ընթացք չստանա «ԱԻՄ+»-ը կդիմի առավել ծայրահեղ միջոցների՝ ասուլիս կտա։
