Արդարադատության նախարարն ի պատասխան «Առավոտի» հարցի ասաց, թե չունի նման տեղեկություններ, որ կառավարությունում է մնացել Ռոբերտ Քոչարյանի կամքով, մինչդեռ Վազգեն Սարգսյանը ցանկանում էր այս պաշտոնում էլ փոփոխություն անել (այս մասին նաեւ հրապարակում է եղել)։ «Մոտակա 1-1,5 տարիներին դեռեւս լուրջ բարեփոխումներ պիտի իրականացնենք։ Եվ, ճիշտն ասած, որեւէ մտահոգություն չեմ ունեցել՝ կմնա՞մ, թե՞ ոչ»։ Իսկ ինչպե՞ս կիրագործվեին լուրջ բարեփոխումները, եթե չմնար։
ՎԱՏ ԼՈՒՐ
Բնապահպանության նախարարության պաշտոնատար անձ ներկայացած մեկը, որ հարմար չգտավ հայտնել իր անուն-ազգանունը, «Առավոտ» զանգահարելով հայտնեց, թե Սեւանի մակարդակը ոչ թե 30 սմ-ով է իջել, այլ, ըստ թաքցվող պաշտոնական տվյալների՝ 72 սմ-ով։ Այս տեղեկությունը ճշտելու համար դիմեցինք բնապահպանության նախարարության մամուլի ծառայություն, այնտեղ էլ մեզ առաջարկեցին այդ հարցն ուղղել ջրային ռեսուրսների պահպանության վարչության պետ Հոսնիկ Կիրակոսյանին։ Ողջ աշխատանքային օրվա երկրորդ կեսին նրան զանգելն ապարդյուն էր։
