Վերջին շրջանում Բագրատաշենի մաքսակետով Հայաստան լվացքի փոշի ներկրելու արգելք է գործում: Այդ մասին մեզ հայտնեցին Վրաստան հաճախակի մեկնող եւ այնտեղից տարբեր ապրանքներ ներկրող նոյեմբերյանցիները: Նրանց խոսքերով՝ Բագրատաշենի մաքսակետի աշխատակիցները թույլատրում են Վրաստանից մեկ տուփ լվացքի փոշի ներկրել, սակայն՝ ոչ ավելի քանակությամբ:
Առեւտրականները մեզ ասացին, որ լվացքի ավտոմատ մեքենաների համար նախատեսված լվացքի փոշին Վրաստանում շուրջ 3 անգամ էժան է Հայաստանում վաճառվող նույն ապրանքի համեմատ:
Լվացքի փոշու ներմուծման արգելքից ավելի խիստ է նոր անվադողերի ներկրման տաբուն: Նոյեմբերյանցի գործարարների վկայությամբ՝ Բագրատաշենի մաքսակետի աշխատակիցներն ընդհանրապես արգելել են Վրաստանից նոր անվադողերի Հայաստան ներկրումը: Որոշ հնարամիտ վարորդներ գտել են նման իրավիճակից ելքը. իրենց ավտոմեքենաների անվադողերը փոխում են, տեղադրում խիստ մաշված, հին անվադողեր, հատում հայ-վրացական սահմանը, Վրաստանում գնում, տեղադրում նոր անվադողեր, հներն էլ դեն նետում: Այդ կերպ նրանք խուսափում են անվադողերի ներկրման հետ առնչվող, Բագրատաշենի մաքսակետի աշխատակիցների հետ տհաճ խոսակցությունից:
Նոյեմբերյանցի առեւտրականները կարծում են, որ լվացքի փոշու եւ անվադողերի՝ Հայաստան ներկրման արգելքը կապված է այն բանի հետ, որ Հայաստանում իշխանությունների հետ սերտաճած օլիգարխներն են ներկրում դրանք, եւ այդ պատճառով մարդկանց արգելում են հիշյալ ապրանքները, թեկուզ փոքր քանակությամբ, Հայաստան ներմուծել:
Անվադողերի եւ լվացքի փոշու Հայաստան ներկրման արգելքի հարցով պարզաբանումներ ստանալու նպատակով մենք տարբեր օրերի եւ ժամերի զանգահարեցինք Գուգարքի տարածաշրջանային մաքսատան Բագրատաշենի մաքսակետ, սակայն զարմանալի զուգադիպությամբ մաքսակետի 12-21 հեռախոսահամարը միշտ զբաղված է ցույց տալիս:
Կարդացեք նաև
Ոսկան ՍԱՐԳՍՅԱՆ
