Հանրային խորհրդի Ձեռնարկատիրական և սպառողների իրավունքների հարցերի հանձնաժողովի նախագահ Արշակ Սադոյանն այսօր էլեկտրաէներգիայի գնի թանկացման քննարկումից հեռացավ տպավորությամբ, որ քաղաքացիներին խաբում են ու թանկացման անհրաժեշտություն չկա:
«Բերված փաստարկների 90 տոկոսն անիմաստ էին»,- Aravot.am-ին ասաց պարոն Սադոյանը:
Նրա պատմելով, Էլեկտրացանցեր ընկերությունից գոհացուցիչ պատասխան չեն տվել նաեւ իրենց այն հարցին, թե պարտքերը փակելուց հետո, եթե ճեղքվածքը վերանա, սակագինը կնվազի՞, թե՞ ոչ. «Ոչ մի պատասխան, այսինքն` անընդհատ գները կարելի է ավելացնել եւ ոչ մի պակասեցնել: Տպավորություն ունեմ, որ հանրային ծառայությունները կարգավորող հանձնաժողովն առաջին հերթին պաշտպանում է նույնիսկ ոչ թե Հայաստանին պատկանող Երեւան Ջեկի կամ ատոմակայանի շահերը, այլ Ռուսաստանի շահերը… այսինքն, եթե գողը տնից լինի, եզը երդիկից կարող է մտնի»:
Պարոն Սադոյանը նաեւ ասաց, որ զրոյական շահույթ ունեն ատոմակայանն ու Երեւանի Ջեկը, իսկ բաշխիչ էլեկտրացանցեր ընկերությունն ունի 25 տոկոս շահույթ. «Թեեւ ուզում են թաքցնեն ու ասում են, թե 12-14 տոկոս է շահույթը: Իրականում հաշվարկները ցույց են տալիս, որ 25 տոկոս է, դա էլ քիչ է, ուզում են թանկացնել…Զարմանալի է նաեւ, որ այսօր հանձնաժողովի նիստում ներկայացրին 17,8 միլիարդ դրամի ճեղքվածք, իսկ կայքում գրված է ավելի: Այսինքն, իրենց թվերի տերը չեն, երբ պետք է ավելացնում են, երբ պետք է պակասեցնում են »:
Կարդացեք նաև
Մանրամասները` տեսանյութում
Արփինե ՍԻՄՈՆՅԱՆ
