Կոտայքի մարզպետ Ա. Հարությունյանն այցելել է մարզի Զովունի համայնք: Համայնքի ղեկավար Ս. Ավետիսյանի ուղեկցությամբ Կոտայքը մարզպետը նախ հանդիպում է ունեցել համայնքի բազմաբնակարան շենքի բնակիչների հետ: Հավելեք, որ այս շենքի տանիքը ամիսներ առաջ փլուզվել էր ուժգին քամու հետևանքով, որի վերականգնման համար պահանջվել է շուրջ 10 մլն դրամ:
Կոտայքի մարզպետ Ա. Հարությունյանը խոստացել է այսուհետ ևս ուշադրության կենտրոնում պահել բազմաբնակարան այս շենքի` սոցիալապես անապահով ընտանիքների հիմնախնդիրները:
Այնուհետև մարզպետը եղել է «Զովունի ԱԱՊԿ» ՓԲԸ-ում: Զրուցել աշխատակիցների, ինչպես նաև այցելուների հետ: Քննարկման ընթացքում մարզպետը կարևորել է բուժհաստատության կողմից մատուցվող ծառայությունների և ազգաբնակչության սպասարկման որակակական ցուցանիշների բարձրացումը, ինչպես նաև անդրադարձ կատարել դեղորայքակախյալ հիվանդների հետ տարվող աշխատանքներին: Առողջապահական հաստատությունում վերլուծության են ենթարկվել նաև աշխատավարձերի բարձրացմանը միտված մի շարք հարցեր:
Ա. Հարությունյանն այցելել է նաև համայնքի երաժշտական դպրոց և մշակույթի կենտրոն: Համայնքի մշակույթի կենտրոնում կատարած շրջայցից հետո Կոտայքի մարզպետին ներկայացվել են տեղի մարզական և մշակութային խմբակների գործունեության մանրամասները, վերջիններիս աշխատանքային ուղղություներն ու համայնքի ունեցած մարզա-մշակութային հաջողությունները:
Համայնքապետարանում կայացած աշխատանքային հանդիպմանը մասնակցել են համայնքի ակտիվի ներկայացուցիչները: Այստեղ քննարկվել են համայնքում կատարված աշխատանքների հիմնական դրսևորումները, համայնքի ղեկավարի կողմից ներկայացվել են համայնքի բյուջեի հնարավորություններով իրականացված ծրագրերի ընդհանրական մոտեցումները և նախանշվել առաջիկայում նախատեսվող անելիքները:
Կոտայքի մարզպետ Ա. Հարությունյանը համայնքային ակտիվի հետ հանդիպման ընթացքում ընդգծել է համայնքի զարգացումն ապահովող ձեռնարկների շարունակականության անհրաժեշտությունը և պատրաստակամություն հայտնել աջակցել համայնքային բոլոր գործընթացներին:
Համայնքի մանկապարտեզում կատարած շրջայցի ընթացքում մարզի ղեկավարին ներկայացվել են նախադպրոցական ուսումնական հաստատության առօրյայի կազմակերպմանն ու գործունեության ծրագրային մոտեցումներին միտված հարցեր:
Մարզպետ Հարությունյանի աշխատանքային այցելությունն ամփոփվել է Զովունու միջնակարգ դպրոցում, որտեղ նա հանդիպումներ է ունեցել ինչպես աշակերտների, այնպես էլ մանկավարժների հետ:
Դպրոցի սաների հետ զրույցների ընթացքում մարզպետը կարևորել է նրանց ռազմա-հայրենասիրական պատշաճ գիտելիքներ ձեռք բերելու և կիրառելու հրամայականը:
Կրթօջախի մանկավարժների հետ հանդիպման ընթացքում անդրադարձ է կատարվել կրթության որակին, սովորողներին համակողմանի գիտելիքներ մատուցելու կարևորություններին, ինչպես նաև դպրոցի աշխատողների սոցիալական պայմանների բարելավմանն ու աշխատավարձերի բարձրացմանը:
Կոտայքի մարզպետը դրական է գնահատել համայնք-դպրոց արդյունավետ համագործակցությունը և փաստել, որ այն պետք է առավել կատարելագործվի:
Զովունու միջնակարգ դպրոցում Կոտայքի մարզպետը ծանոթացել է նաև ՀՀ Կառավարության կողմից հատկացված 5-րդ հրատապ ծրագրով իրականացված շինարարությանը, ինչպես նաև պատասխանատուների հետ քննարկել հիմնանորոգման աշխատանքների շարունակմանը վերաբերող հարցեր: Մանրամասները՝ տեսանյութում:
ՀՀ Կոտայքի մարզպետարանի տեղեկատվության
և հասարակայնության հետ կապերի բաժին
