Ըստ Արմեն Ալավերդյանի, ներառական կրթությունը Հայաստանում ձեւական բնույթ է կրում
«IDEAS ներառական որոշումներ հավասար եւ հաշվետու հասարակության համար » ծրագրի շրջանակներում դեկտեմբերի 6-ից Ծաղկաձորում մեկնարկել է «Ոչինչ մեր մասին՝ առանց մեզ» քառօրյա դասընթացը, որն իրականացնում է Բրիտանական խորհուրդը՝ Եվրոպական միության ֆինանսավորմամբ:
Ծրագիրն իրականացվում է Հայաստանում, Վրաստանում, Ադրբեջանում, Հորդանանում, Լիբանանում եւ Ուկրաինայում:
«Ունիսոն» հ/կ-ի գործադիր տնօրեն Արմեն Ալավերդյանը ներկայացրեց հաշմանդամության ներկա իրավիճակը Հայաստանի Հանրապետությունում, ապա խոսեց հաշմանդամության բժշկական և սոցիալական մոդելների ու դրանց տարբերությունների մասին:
Կարդացեք նաև
Պարոն Ալավերդյանն ասաց, որ իրենց ցանկությունն է, որ երկիրն ավելի ներառական դառնա, պակասեն ձեւական բնույթի ծրագրերը: Նա նաեւ փաստեց, որ վերջին երկու տարում Երեւանում բավականին դրական փոփոխություններ են կատարվել, սկսել են լավ թեքահարթակներ կառուցել, որոշ չափով հեշտացել է տեղաշարժը: «Վերջապես երկար կունենանք նաեւ երկար սպասված մեր տասը ավտոբուսները՝ վերելակներով, գուցե նաեւ կնկարվենք այդ ֆոնի վրա»,- կես կատակ-կես լուրջ հավելեց պարոն Ալավերդյանը:
«Ունիսոն» հ/կ-ի գործադիր տնօրենը անդրադառնալով ներառական կրթությանը, նշեց, որ հաճախ հայաստանցի պաշտոնյաները շրջագայելով տարբեր երկրներում՝ հայտարարում են, թե ներառական կրթության առումով Հայաստանն առաջատար է ԱՊՀ-ում, իրականում, նրա խոսքով, Հայաստանում 100-ից ավելի դպրոցներ կան, որոնք ունեն ընդամենը թեքահարթակ, մինչդեռ անմատչելի են դասասեղանները, սանհանգույցը, դպրոցի տնօրինությունն էլ պատրաստված չէ: «Նման դպրոցներում կարող են սովորել թեթեւ խնդիր ունեցող երեխաները, իսկ եթե կույր երեխա կա՞»,-տարակուսանք հայտնեց Արմեն Ալավերդյանը: «Ասում են 2022-ին 100 %-անոց ներառական կրթություն կլինի, այսինքն` ստացվում է 100 %-անոց ձեւականություն կլինի: Մինչդեռ ավելի լավ կլիներ ունենայինք ավելի քիչ, բայց իրականում ներառական կրթություն իրականացնող դպրոցներ»,- փաստում է Արմեն Ալավերդյանը:
Գոհար ՀԱԿՈԲՅԱՆ
