Բելառուսի նախագահ Ալեքսանդր Լուկաշենկոն կոչ է անում ԱՊՀ-ին սկսել լուծել հետխորհրդային տարածքի լուրջ խնդիրների լուծման գործընթացը: Այս հայտարարությունն, ըստ «Belta»-ի, Լուկաշենկոն արել է այսօր ԱՊՀ երկրների ղեկավարների խորհրդի նիստին:
«ԱՊՀ-ում պետք է սկսել քննարկել հետխորհրդային տարածքի լուրջ խնդիրները եւ, ինչքան որ հնարավոր է, շահագրգռել նրանց, որոնցից կախված է դրանց լուծումները: Եթե դա չլինի, մենք կգնանք դեպի ԱՊՀ-ի անկում»,- ասել է Լուկաշենկոն:
Բելառուսի ղեկավարը նաեւ նշել է, որ ԱՊՀ երկրների ղեկավարների այս նիստի օրակարգը բաղկացած է հայտարարություններից եւ ցանկություններից. «Ղազախստանին կամ Ռուսաստանին, կամ Բելառուսին մեղադրել այն բանում, որ ԱՊՀ-ն արդյունավետ չէ, իմաստ չունի: ԱՊՀ-ի ղեկավարները ընդունում են, որ սա բանակցությունների կարեւոր հարթակ է եւ, ոչ մի դեպքում, այն պետք չէ ոչնչացնել»:
ԱՊՀ-ի հեղինակությունը եւ պահանջարկը, ըստ Լուկաշենկոյի, կլինի, երբ այն կլուծի ամենակարեւոր հարցերը: Որպես օրինակ նա բերել է Լեռնային Ղարաբաղի, Մերձդնեստրի եւ Ուկրաինայի հակամարտությունները. «Մենք անամոթաբար խուսափում ենք այդ հարցերից: Մենք, կարծես թե, սովորել ենք, որ սպասենք ամերիկացիները, Եվրամիությունը կամ ուրիշ մեկը գա եւ այդ «ուժեղ պարոնը» մեզ ասի, թե ինչ ուղղությամբ լուծենք այդ խնդիրը, կամ էլ մեր փոխարեն լուծի այն»:
Կարդացեք նաև
Պատրաստեց Աշոտ ԻՍՐԱԵԼՅԱՆԸ
