«Երեւան» մշակութային կենտրոնում այսօր կայացավ «Տուր Ռիթմ» բարեգործական պարային համերգը, որը կազմակերպել էին «Պարի՛ր, թե կարող ես» նախագծի 3-րդ եթերաշրջանի հաղթող Արմինա Խաչատրյանը և Հայ օգնության ֆոնդի (ՀՕՖ) «Այո» հարթակը: Դահլիճի մուտքի մոտ տեղադրվել էր արկղիկ, որում ցանկացողները գումար հավաքեցին՝ Անահիտ Ցիցիկյանի անվան երաժշտական դպրոցի սաների համար երաժշտական գործիքներ գնելու նպատակով:
«Ցանկացանք աջակցել դպրոցին, որպեսզի այն իր հերթին կօգնի փողային գործիքներ նվագել ցանկացող երեխաներին»,- Aravot.am-ի հետ զրույցում ասաց Հայ օգնության ֆոնդի «Այո» հարթակի ղեկավար Արմեն Անմեղիկյանը: Նա հավելեց, որ նախաձեռնությանը միացել են Հայաստանի տարբեր քաղաքների մոտ 20 պարային խմբեր եւ անհատ պարողներ:
Անահիտ Ցիցիկյանի անվան երաժշտական դպրոցի փոխտնօրեն Աննա Սահակյանն էլ մեզ հայտնեց, որ դպրոցը հիմնականում փողային եւ լարային գործիքների կարիք ունի. «Աշակերտները սովորում են նվագել քանոն, շվի, դհոլ: Գործում է կլարնետի դասարան, սակայն գործիքի պակասի պատճառով մեկ-երկու սան ունենք: Չունենք սաքսոֆոն»:
Կարդացեք նաև
Փոխտնօրենը նաեւ տեղեկացրեց, որ դպրոցը 2016 թվականին ամբողջությամբ կվերանորոգվի, իսկ ջեռուցման խնդիրն արդեն իսկ լուծված է: Այժմ ուսումնական հաստատությունում 80 սան է սովորում:
Մանրամասները` տեսանյութում
Լուիզա ՍՈՒՔԻԱՍՅԱՆ
