Այսօր առավոտյան Լեռնային Ղարաբաղի Հանրապետության Հանրապետական բժշկական կենտրոն է ընդունվել 1973 թվականի ծնված Արթուր Արզանգուլյանը` վերին ձախ վերջույթի բազմաբեկորային կույր վնասվածքով, ձախակողմյան տրավմատիկ հեմոպնեւմոթորաքսով, մետաղյա բեկոր վերել աորտայի առաջնային պատի վրա: Կատարվել է պլեւրալ խոռոչի դրենավորում, վերին վերջույթների կույր վիրավորումների մշակում:
Այս մասին Aravot.am-ին տեղեկացրին ԼՂՀ առողջապահության նախարարությունից:
Ըստ նույն աղբյուրի, Ստեփանակերտի Հանրապետական բժշկական կենտրոնում այս պահին բուժում է ստանում 5 վիրավոր: Զավեն Ավանեսյանը, Կամո Աբրահամյանը, Ծովինար Աղաջանյանը գտնվում են վերակենդանացման բաժանմունքում, նրանց վիճակը` կայուն ծանր է, դրական դինամիկայով: Գարեգին Աղաջանյանը բուժումը շարունակում է վիրաբուժական բաժանմունքում, վիճակը` կայուն:
ԼՂՀ «Արեւիկ» բուժմիավորումում բուժվող վիրավոր երեխաների վիճակը կայուն ծանր է: Գեւորգի Գրիգորյանին ընդհանուր անզգայացմամբ վիրակապվել են, երկրորդային մշակման է ենթարկվել վերքը, շարունակվում է ինտենսիվ բուժումը, առկա է դրական դինամիկա: Առողջապահության նախարարության աջակցությամբ Վարդան Անդրեասյանն այսօր կվիրահատվի, կտեղադրվի արտաքին ֆիքսացիայի ապարատը: Մյուս վիրավոր երեխայի՝ Վարդան Անդրեասյանի մոտ եւս դրական դինամիկա է արձանագրվել:
Կարդացեք նաև
ԼՂՀ առողջապահության նախարարությունը կրկին հիշեցնում է՝ հանրապետության բոլոր բժշկական հաստատություններն ապահովված են անհրաժեշտ դեղերով, բժշկական պարագաներով, արյան բավարար պաշարով: Արտակարգ ռեժիմով են աշխատում բժշկական հաստատությունները եւ շտապօգնության ծառայությունը:
Նշենք, որ Ստեփանակերտ է վերադարձել Արցախի առողջապահության նախկին նախարար Հարություն Քուշկյանը: Բացի նրանից, արդեն 3-րդ օրն է Արցախում են նաեւ «Էրեբունի» բժշկական կենտրոնի գործադիր տնօրեն Միքայել Մանուկյանը, կենտրոնի առաջատար մասնագետները՝ անոթային վիրաբուժության բաժանմունքի ղեկավար Արամ Բադալյանը, նյարդավիրաբուժության բաժանմունքի ղեկավար Վահրամ Համբարձումյանը, վիրաբույժ Անդրանիկ Օհանյանը, անեստեզիոլոգ-ռեանիմատոլոգ Արթուր Հովհաննիսյանը:
Երեւանից այցելած մասնագետները արցախցի բժիշկների հետ աշխատում են Ստեփանակերտի եւ շրջանների բժշկական հաստատություններում: Արցախ է տեղափոխվել «Էրեբունի» բուժկենտրոնի շտապօգնության 2 մեքենա` ռեանիմոբիլ, որոնք հագեցած են անհրաժեշտ սարքավորումներով` վիրավորներին տեղում բժշկական օգնություն ցուցաբերելու, արագ եւ անվտանգ Երեւան տեղափոխելու համար:
ՀՀ առողջապահության նախարարության կողմից ուղարկվել են դեղամիջոցներ եւ բժշկական պարագաներ, պոլսօքսիմետրեր, որոնք կտրամադրվեն նաեւ զիվորական հոսպիտալին:
