«Ադրբեջանը բոլոր տեսակի դիվանագիտական եւ քաղաքական էթիկայի եւ կանոնների խախտումով ընկել է հիստերիայի մեջ»,- մայիսի 7-ին «Հայելի» մամուլի ակումբում լրագրողների հետ հանդիպման ընթացքում ասաց արտակարգ եւ լիազոր դեսպան Արման Նավասարդյանը:
Նա նշեց, որ Հայաստանի կամ որեւէ այլ պետության կողմից Լեռնային Ղարաբաղի ճանաչման հարցը որեւէ միջազգային օրենքի չի հակասում. «Հետեւանքները միանշանակ դժվարանում եմ ասել, որովհետեւ կարող է լինել երկակի հետեւանք: Նախ՝ արդյոք կփոխվի իրավիճակը տարածաշրջանում, եւ շատերը դա կապում են պատերազմի հետ: Ես կարծում եմ՝ դա այնքան էլ ճիշտ չէ, եւ պատերազմը լինի, թե չլինի կամ կլինի, թե չի լինի, դա կապված չէ Հայաստանի՝ Ղարաբաղի ճանաչման հարցից»:
Իսկ միջազգային առումով հետեւանքների համար, Արման Նավասարդյանը համարում է, որ պետք է հաշվարկ կատարել, կան մի քանի օրինակներ Հարավային Օսիայի եւ Աբխազիայի, Թուրքիայի կողմից Հյուսիսային Կիպրոսի ճանաչման խնդիրն է, որը փաստորեն ոչ մի արդյունք չի տվել. «Եթե մենք գնալու լինենք, լավ կլինի Կոսովոյի օրինակին հետեւենք»:
Արման Նավասարդյանը համարում է, որ Ղարաբաղը պետք է ճանաչվեր դեռ շատ վաղուց, եւ դա հնարավոր էր: Այդ դեպքում դեռ, ըստ նրա, այսքան արյուն երեւի թե չէր թափվի: Սակայն արտակարգ եւ լիազոր դեսպանը համարում է, որ այսօրվա դրությամբ Լեռնային Ղարաբաղի Հանրապետությունը ճանաչելու դեպքում դրությունը կփոխվի: Նա համարում է, որ առաջին կարեւոր քայլը, որ պետք է կատարել, Լեռնային Ղարաբաղին բանակցությունների մեջ ներգրավելն է:
Կարդացեք նաև
Ամի ՉԻՉԱԿՅԱՆ
