«Ոտքի՛ Հայաստան» քաղաքացիական նախաձեռնությունն այսօր հանդես էր եկել հայտարարությամբ, որում մասնավորապես ասված էր. «Նոր զոհերից խուսափելու համար իրավապահ մարմիններից պահանջում ենք զերծ մնալ ապստամբած քաղաքացիների դեմ ուժ գործադրելուց և առավոտյան առաջացած ճգնաժամը կարգավորել բացառապես բանակցությունների ճանապարհով: Քաղաքական և հասարակական ուժերի ներկայացուցիչներին հրավիրում ենք 20.00-ին Ազատության հրապարակ քաղաքացիների հետ խորհրդակցությանը՝ ստեղծված իրավիճակից ելքեր որոնելու համար: Սույն հայտարարությունը հանդիսանում է իրազեկում Երևանի քաղաքապետարանի և ՀՀ ոստիկանության համար: Հավաքը օրինական է, խնդիրը հրատապ և պետության համար գերկարևոր»:
Քիչ առաջ Ազատության հրապարակում ոստիկանները բերման ենթարկեցին չորս քաղաքացու, որոնցից երեքը կանայք էին: Վերջիններս նստած էին Ազատության հրապարակի նստարաններին, երբ ոստիկանները մոտեցան նրանց եւ ուժի գործադրմամբ նստեցրին ոստիկանական մեքենան: Կանայք բղավում էին, որ իրենք ուսուցիչներ են ու պարզապես իրենց հանգիստն են անցկացնում Ազատության հրապարակում:
Կարդացեք նաև
Հյուսիսային պողոտայի եւ Թումանյան փողոցի հատման վայրից բերման ենթարկվեց մեկ տղամարդ:
Դրանից հետո ընթացավ «Ոտքի՛ Հայաստան» քաղաքացիական նախաձեռնության հավաքը: Անդրիաս Ղուկասյանի շուրջ հավաքվել էին մոտ քսան քաղաքացիներ:
Սակայն քիչ առաջ «Ազատության հրապարակից բերման ենթարկեցին նաեւ Դավիթ Սանասարյանին եւ Անդրեաս Ղուկասյանին:
Այս պահին «Ժառանգություն» կուսակցության անդամներ Զարուհի Փոստանջյանը եւ Արմեն Մարտիրոսյանն են ժամանել «Ազատության» հրապարակ: Զարուհի Փոստանջյանը պահանջեց պատասխանատվության ենթարկել այն ոստիկանին, որը հրեց Շահեն Հարությունյանին: Զարուհի Փոստանջյանը փորձեց «հետապնդել» ոստիկանական ՈՒԱԶ-ը, որով բերման ենթարկեցին Շահեն Հարությունյանին:
Լրագրողների հետ զրույցում Զարուհի Փոստանջյանը տեղեկացրեց, որ ոստիկանները փորձում են բերման ենթարկել «Ժառանգություն» կուսակցության անդամներին: Նրանք, ըստ Փոստանջյանի, ներխուժել են կուսակցության գրասենյակ, տարել պահակին ու փորձում են բերման ենթարկել կուսակցության այլ անդամների՝ նաեւ մարզային գրասենյակներից:
Լուիզա ՍՈՒՔԻԱՍՅԱՆ
