Ռուսական արվեստի թանգարանում այսօր` սեպտեմբերի 3-ին, ներկայացվեց նկարչուհի Մարիամ Ասլամազյանի «Կյանքի դավթարը» ինքնակենսագրական գիրքը, որի վաճառքի հասույթն ուղղվելու է Գյումրու Մարիամ և Երանուհի Ասլամազյան քույրերի պատկերասրահի նորոգմանը:
Պատկերասրահի տնօրեն Վահագն Ղուկասյանն Aravot.am-ի հետ զրույցում ասաց, որ գիրքն առաջին անգամ հրատարակվել է 2000 թվականին Մոսկվայում` հեղինակի` Մարիամ Ասլամազյանի միջոցներով, սակայն սահմանափակ քանակությամբ: Այն ներառում է նկարչուհու կյանքի եւ ստեղծագործական գործունեության մասին ամփոփ եւ հետաքրքրական տվյալներ, այդ թվում` Մարտիրոս Սարյանի, Վազգեն Առաջին կաթողիկոսի եւ Ինդիրա Գանդիի հետ հանդիպումների հուշերը:
Կարդացեք նաև
«Մարիամ Ասլամազյանը պարզ գրելաոճ ունի` անկեղծ շարադրանքով ներկայացնում է իր հույզերը, ճանաչված մարդկանց հետ հանդիպումները»,-նկատեց Վահագն Ղուկասյանը:
Նա հիշեց, որ որբ սկսել է աշխատել պատկերասրահում, մշակութային օջախում գրքից ընդամենը մեկ օրինակ է եղել, որին թանգարանային նմուշի պես են վերաբերվել. «Գիտակցելով գրքի արժեքը` որոշեցինք նախաձեռնել վերահրատարակումը, որպեսզի այն ներկայացնենք նաեւ հանրությանը»,-ասաց նա:
Մեր զրուցակիցը նաեւ տեղեկացրեց, որ «Կյանքի դավթար»-ում առաջին անգամ տեղ են գտել նաեւ քանդակագործ Նիկոլայ Նիկողոսյանի հուշերը` Մարիամ Ասլամազյանի մասին:
Լուիզա ՍՈՒՔԻԱՍՅԱՆ
