Ժողովրդական բժշկության մեջ մասուրն օգտագործվում է սուր եւ քրոնիկ հիվանդությունների բուժման ժամանակ, ինչպիսիք են` դեղնախտը, լեղապարկի բորբոքումը, լեղաքարային հիվանդությունները, ստամոքսի բորբոքումը, սրտի, լյարդի, երիկամների, երիկամաքարային հիվանդությունները, միզապարկի բորբոքումը, այրան բարձր ճնշումը, եւ շատ ու շատ այլ հիվանդություններ:
Մասուրի արմատի եփուկը բուժում է ռեւմատիզմը եւ հոդացավերը: Եփուկ պատրաստելու համար անհրաժեշտ է 2 ճաշի գդալ մանրացրած արմատը լցնել 2 բաժակ ջրի մեջ եւ դանդաղ կրակի վրա եփել 20-30 րոպե: Այնուհետեւ քամել, սառեցնել եւ ընդունել 2-3 ճաշի գդալ 3-4 անգամ օրվա մեջ, ուտելուց 15 րոպե առաջ:
Վերքերի բուժման համար 15-20 օր այդ թուրմից թրջոց կարելի է դնել վերքին: Թարմ եւ չորացրած մասուրի ծաղիկները եփում են, որպես թեյ թողնում 15-20 րոպե եւ խմում կես բաժակ՝ 3-4 անգամ օրական, ստամոքսի եւ լեղապարկի հիվանդությունների բուժման համար:
Ըստ միջնադարյան բժշկագետների՝ ամենաուժեղ ներգործությունն են ունենում մասուրի ծաղիկները:
Ծաղիկների հոտը շնչելով՝ ամրանում է սիրտը, ուղեղը, զգայական օրգանները, հանգստանում է նյարդային համակարգը: Ծաղիկների թփերի թուրմը օգնում է ատամի ցավին, լնդերի բորբոքմանը, սրտխփոցին: Ծաղիկի թփերից մոտ 16 գրամը թուրմի ձեւով ներգործում է որպես ուժեղ փոր թուլացնող եւ միզամուղ, քրտինքի հոտը վերացնում է լրիվ:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ»
25,03.2017
