«Միջազգային եւ անվտանգության հարցերի հայկական ինստիտուտի» «Ժողովրդավարություն, անվտանգություն եւ արտաքին քաղաքականություն» խորագրով 3-րդ համաժողովում այսօր ՀՀ նախագահ Արմեն Սարգսյանն անդրադարձավ Ամուլսարի հանքի շահագործման խնդրին՝ այն «ցավոտ հարց» որակելով: Արմեն Սարգսյանը նախ շեշտեց, որ Հայաստանի համար չափազանց մեծ արժեք է ջրի պահպանությունը, մինչդեռ Արարատյան դաշտավայրի խորքային հորերի ջրերը վատնում են ձկնաբուծարանների համար:
«Էդուարդո Էռնեկյանն ինձ հետ զրույցում ասում էր՝ 400 հեկտարի վրա գինի է աճեցնում, սակայն արտադրական ծավալները չի ավելացնում, քանի որ ջրի կորուստ է գրանցվում…Էջմիածնում իմ ներդրումներով դպրոց եւ եկեղեցի է կառուցվել, բայց պատերը ճաքել են, որովհետեւ խորքային հորերի հավասարակշռությունն է խախտվել»,-հայտնեց Արմեն Սարգսյանը:
Դառնալով Ամուլսարի խնդրին՝ նախագահը նշեց. «Ամուլսարը զգայուն տեղում է, եթե ջրերն աղտոտվեցին, մեծ խնդիրների առաջ ենք կանգնելու: Չի կարելի թույլ տալ, որ հանքարդյունաբերությամբ աղտոտվի ամենակարեւոր բնական ռեսուրսը՝ ջուրը»:
Ինչ վերաբերում է Ամուլսարի հանքը շահագործող «Լիդիան» ընկերության հետ իր հնարավոր առնչություններին, Արմեն Սարգսյանը նկատեց՝ հայաստանյան մամուլում գրեցին, թե ինքը տնօրեն է, սակայն նման բան չի եղել:
«Ես եղել եմ անկախ տնօրենների խորհրդի անդամ, բայց անգամ մեկ դոլարի շահ չենք ունեցել ես եւ ընտանիքս: Դա օրենքով է սահմանված: Ես այդ ժամանակ ծանոթացել եմ հանքի շահագործման փաստաթղթերին ու դուրս եկել տնօրենների խորհրդի կազմից: Իհարկե, էթիկայից ելնելով, չեմ կարող հրապարակել, թե ինչ կարծիքներ եմ գրել այդ փաստաթղթերի մասին: Ես կապ չեմ ունեցել «Լիդիան»-ի հետ եւ այստեղ պետք է վերջակետ դնել»,-եզրափակեց Արմեն Սարգսյանը:
https://www.facebook.com/aravot.am/videos/2066387496713088/
Լուիզա ՍՈՒՔԻԱՍՅԱՆ
