«Թյուրըմբռնում կա. օրինագիծը սահմանում էր, որ վարչապետի, ԱԺ նախագահի եւ ՀՀ նախագահի արարողակարգային գնումները հրապարակվեն, բայց դա չի ենթադրում այնպիսի փաստերի հրապարակում, որոնք հարվածի տակ կդնեին նրանց անվտանգությունը: Տարիներ առաջ, երբ օրենքը սահմանում էր այդ գնումների հրապարակայնություն, անվտանգության խնդիրներ չեն առաջացել»,-«Մեդիա կենտրոնում» լրագրողների հետ հանդիպմանն այսօր անդրադառնալով «Գնումների մասին օրենքում» փոփոխություններ կատարելու մասին «Լուսավոր Հայաստան» խմբակցության օրինագծին, որի քննարկումն օրերս մերժվեց ԱԺ-ում, ասաց «Հանրային քաղաքականության հետազոտությունների ազգային կենտրոն» հ/կ-ի գործադիր տնօրեն Արմենուհի Բուռնազյանը:
Նրա խոսքով. «Գաղտնիք պարունակող գնումները, պարզ է, որ չպետք է հրապարակվեն, սակայն արարողակարգային գնումների փակ լինելը ռիսկային է: Արարողակարգային ծախսերի տակ շատ բան կարելի է հասկանալ: Կասկած է առաջանում, թե երկրի 3 առաջին դեմքերի գնումների որ մասն է հայտնվում գաղտնի անվան տակ»:
Արմենուհի Բուռնազյանը կարծում է, որ նախագծի քննարկումը մերժելու հետեւանքով երեք պաշտոնյաների գնումների գործընթացը հանրությանը թերի կներկայացվի, եւ դա չի փաստի գործընթացի թափանցիկության մասին. «Հ/կ-ների եւ ԶԼՄ-ների համար էլ դժվար կլինի մշտադիտարկման նպատակով տեղեկություններ ստանալը: Տեղեկությունը հաճախ չի տրվում՝ գաղտնիության քողի տակ: Երբ գնումների հանդեպ հանրային վերահսկողություն է լինում, դրանք արդյունավետ են կատարվում: Մենք կողմ ենք, որ այդ գնումները, բացառությամբ անվտանգային բաղադրիչի, ներկայացվեն հանրությանը»:
Կարդացեք նաև
Լուիզա ՍՈՒՔԻԱՍՅԱՆ
Լուսանկարը՝ «Մեդիա կենտրոնի»
