«Այսօր մենք ականատես ենք նրան, որ իշխանությունների դանդաղկոտությունը, իրավական-քաղաքական գնահատական չտալն անցյալին բերեց ներքին լարվածության, որ հեղափոխությանը սատարող քաղաքացիները հիասթափություն ապրեցին, սկսեցին կասկածել քաղաքական իշխանության կամքին»,- «Հոդված 3» ակումբում «Հանրաքվեից առաջ. ի՞նչ մոտեցումներ ունեն քաղհասարակության կառույցները» թեմայով քննարկմանն այսպիսի կարծիք հայտնեց Թրանսփարենսի Ինթերնեշնլ հակակոռուպցիոն կենտրոնի տնօրեն Սոնա Այվազյանը:
Ըստ նրա՝ այս իրավիճակը հակահեղափոխականների մոտ հույս առաջացրեց, որ դեռ կարող են գալ իշխանության:
Սոնա Այվազյանի կարծիքով՝ սահմանադրական հանրաքվեի որոշումը դրական է, բայց միևնույն ժամանակ նշեց. «Իհարկե, շատ ավելի դրական կլիներ, եթե այն արվեր այլ եղանակով, այլ մասնակցության պայմաններում՝ միգուցե ընդհանուր սահմանադրական փոփոխությունների համատեքստում: Սակայն դրան դեռևս պատրաստ չէին, իսկ ՍԴ խնդիրն օր առաջ պետք է լուծել, և այդ առումով ես էլ չեմ տեսնում ելք, որը հնարավոր էր: Դրականն այն էր, որ այդ կարևոր որոշումը ոչ թե քաղաքական իշխանությունը որոշեց կայացնել, այլ հանձնեցին ժողովրդի դատին»:
Սոնա Այվազյանը նշեց, որ շուտով իրենք կհրապարակեն իրանց կատարած հարցումների արդյունքները բնակչության շրջանում՝ համապատասխան որոնց ամենակոռումպացվածն իրավական համակարգն է, երկրորդը ԶԼՄ-ներն ու նաև դատախազությունը:
Կարդացեք նաև
Սոնա Այվազյանը հիշեցրեց՝ տարիներ շարունակ ՀՀ-ում ընտրությունների արդյունքները կեղծվել են տվյալ օրվա իշխանության՝ ռեժիմի կողմից, և այդ հանցագործությունն ավարտին հասցնելու կառույցը միշտ եղել է ՍԴ-ն՝ այդպիսով հուսալքելով ժողովրդին:
Տաթև ՀԱՐՈՒԹՅՈՒՆՅԱՆ
Լուսանկարը՝ «Հոդված 3» ակումբի
