Երևանի Կապույտ մզկիթի գրադարանում տեղի է ունեցել «Ծանոթություն «Շահնամե»-ի և Հաքիմ Ֆիրդուսիի հետ» խորագրով գիտաժողով, որը կազմակերպվել էր Հայաստանում Իրանի Իսլամական Հանրապետության դեսպանության Մշակույթի կենտրոնի նախաձեռնությամբ։ Միջոցառմանը մասնակցել են անվանի իրանագետներ, դասախոսներ, ուսանողներ և արվեստի ներկայացուցիչներ։
Բացման խոսքում ԻԻՀ դեսպանության Մշակույթի կենտրոնի տնօրեն, դոկտոր Մոհամմադ Ասադի Մովահեդը ընդգծել է, որ Ֆիրդուսին միայն բանաստեղծ չէր, այլև մեծ մշակութային գործիչ, որի «Շահնամեն» ներկայացնում է «պատմական մոռացության դեմ ուղղված մշակութային դիմադրության բացառիկ օրինակ»։ Նրա խոսքով, էպոսը ձևավորում է արժեքային համակարգ, որը գերազանցում է աշխարհագրական սահմանները և կարող է դառնալ տարածաշրջանի ժողովուրդների մշակութային երկխոսության հարթակ։
- Հայ-իրանական մշակութային ընդհանրություններ
Գիտական զեկույցով հանդես է եկել շահնամեագետ դոկտոր Անահիտա Վալին, որը մանրամասն ներկայացրեց էպոսի կառուցվածքային և գաղափարական շերտերը՝ առանձնակի շեշտադրելով «Շահնամե»-ում առկա հայ-իրանական պատմամշակութային զուգահեռները։
Կարդացեք նաև
«Այս ստեղծագործությունը քաղաքակրթական ընդհանուր ժառանգություն է։ Քանի դեռ «Շահնամեն» ընթերցվում է, ազգի մշակութային շունչը կենդանի կմնա»,– նշել է դոկտոր Վալին՝ անդրադառնալով նաև «Զալ և Սիմորղ» պատմության խորհրդաբանությանը և Ֆիրդուսու փիլիսոփայական հայացքներին։
- Արվեստը՝ որպես մշակութային կամուրջ
Գիտաժողովը ուղեկցվել է գեղարվեստական կատարումներով։ Իրանցի աշակերտը ներկայացրել է «Շահնամե»-ի հատվածների ասմունք, իսկ հայ երաժիշտը կատարել է «Էյ Իրան» ստեղծագործությունը, որը դարձավ երկու ժողովուրդների հոգևոր մերձեցման խորհրդանիշ։
Միջոցառման ավարտին տեղի ունեցած հարցուպատասխանի ժամանակ մասնակիցները քննարկել են դասական գրականության դերը ժամանակակից աշխարհի մարտահրավերների հաղթահարման և միջմշակութային կապերի ամրապնդման գործում։
ԻԻՀ ԴԵՍՊԱՆՈՒԹՅԱՆ ՄՇԱԿՈՒՅԹԻ ԿԵՆՏՐՈՆ
